O‘zbekistonda davom etayotgan Axborot-kommunikatsiya texnologiyalari haftaligi doirasida 14-sentabr kuni LG CNS Uzbekistan qo‘shma korxonasi ochilish marosimi bo‘lib o‘tdi. Axborot texnologiyalari va kommunikatsiyalarini rivojlantirish vazirligi axborot xizmati xabariga ko‘ra, unda LG CNS kompaniyasi prezidenti Kim De Xun va kompaniya vitse-prezidentlari — Pak Jin Kug va Li Chol qatnashdi.
O‘zbekiston va Janubiy Koreya o‘rtasida tashkil etilgan mazkur qo‘shma korxonaning asosiy faoliyat yo‘nalishi dasturiy mahsulotlarni ishlab chiqish, qurilmaviy-dasturiy majmualarni o‘rnatish va tatbiq etish, shuningdek, “Elektron hukumat” tizimi hamda iqtisodiyotning real sektori korxonalari uchun loyihaviy va texnikaviy hujjatlarni shakllantirishdan iborat.
LG CNS Uzbekistan korxonasi loyihalarni amalga oshirishda mahalliy kompaniya va dasturchilar bilan hamkorlik qilish va ularni jalb etishni rejalashtirgan. Hozirgi vaqtda korxona “Elektron hukumat” tizimining yirik loyihalarini amalga oshirishga kirishgan.
LG CNS kompaniyasi 1987-yili LG korporatsiyasi tomonidan ta’sis etilgan. U axborot texnologiyalari sohasida xizmat ko‘rsatish bo‘yicha Janubiy Koreyadagi eng yirik kompaniya hisoblanadi. Kompaniya jahon bo‘ylab 10 dan ortiq mintaqaviy bo‘limlarga ega hamda xodimlarining umumiy soni 10 ming kishidan oshadi.
Izoh (0)