Ўзбекистонда давом этаётган Ахборот-коммуникация технологиялари ҳафталиги доирасида 14 сентябрь куни LG CNS Uzbekistan қўшма корхонаси очилиш маросими бўлиб ўтди. Ахборот технологиялари ва коммуникацияларини ривожлантириш вазирлиги ахборот хизмати хабарига кўра, унда LG CNS компанияси президенти Ким Де Хун ва компания вице-президентлари — Пак Жин Куг ва Ли Чол қатнашди.
Ўзбекистон ва Жанубий Корея ўртасида ташкил этилган мазкур қўшма корхонанинг асосий фаолият йўналиши дастурий маҳсулотларни ишлаб чиқиш, қурилмавий-дастурий мажмуаларни ўрнатиш ва татбиқ этиш, шунингдек, «Электрон ҳукумат» тизими ҳамда иқтисодиётнинг реал сектори корхоналари учун лойиҳавий ва техникавий ҳужжатларни шакллантиришдан иборат.
LG CNS Uzbekistan корхонаси лойиҳаларни амалга оширишда маҳаллий компания ва дастурчилар билан ҳамкорлик қилиш ва уларни жалб этишни режалаштирган. Ҳозирги вақтда корхона «Электрон ҳукумат» тизимининг йирик лойиҳаларини амалга оширишга киришган.
LG CNS компанияси 1987 йили LG корпорацияси томонидан таъсис этилган. У ахборот технологиялари соҳасида хизмат кўрсатиш бўйича Жанубий Кореядаги энг йирик компания ҳисобланади. Компания жаҳон бўйлаб 10 дан ортиқ минтақавий бўлимларга эга ҳамда ходимларининг умумий сони 10 минг кишидан ошади.
Изоҳ (0)