2015-yilning 24—26-avgust kunlari O‘zbekistondagi Britaniya Kengashi vakolatxonasi, O‘zbekiston Respublikasi oliy va o‘rta maxsus ta’limi vazirligi hamda O‘zbekiston davlat jahon tillari universiteti hamkorligida “Davlat ta’lim standartlarini amaliyotga tatbiq etish” mavzusida intensiv trening o‘tkazildi. Bu haqda Britaniya Kengashi “Daryo”ga ma’lum qildi.
Yangi o‘quv yili bo‘sag‘asida o‘tkazilayotgan treningda “Bo‘lajak ingliz tili o‘qituvchilarini tayyorlash uchun yangi o‘quv dasturi” loyiha ishtirokchilari yig‘ilib, yangi o‘quv yili oldidan aniq vazifalarni va ularni hayotga tatbiq etish masalalarini muhokama qildi. Treningda quyidagi masalalar ko‘rib chiqildi: madaniyatlararo muloqot kompetensiyasini rivojlantirish moduli, ingliz tili xalqaro til sifatida, til ko‘nikmalarini rivojlantirish moduli, og‘zaki va yozma nutq, o‘qish va eshitish ko‘nikmalarini baholash.
Ushbu dastur respublikada ta’lim sohasida olib borilayotgan, jumladan ingliz tilini o‘qitish tizimini takomillashtirishga yo‘naltirilgan keng qamrovli islohotlar doirasida amalga oshirilib, sohadagi kadrlar, ya’ni o‘qituvchi va murabbiylar malakasini doimiy ravishda oshirishga qaratilgan. Treningda mamlakatning 18 ta oliy o‘quv yurtlaridan kelgan 200 dan ziyod ingliz tili o‘qituvchilari ishitirok etib, ular 2013-yildan boshlab yangi, jahon standartlariga mos o‘quv dasturi bo‘yicha bo‘lajak ingliz tili muallimlarini tayyorlamoqda. Yangi o‘quv dasturi O‘zbekiston Respublikasi oliy va o‘rta maxsus ta’limi vazirligi hamda Britaniyaning Norich til ta’limi instituti tomonidan ishlab chiqilgan.
Ushbu loyiha 34 ming o‘qituvchi va 6,5 million talabaga ingliz tili ta’limi jarayonida ijobiy ta’sir ko‘rsatadi. Trening davomida jahon talablariga javob beruvchi o‘quv materiallarini tuzish, sifatli baholash tizimini amalga tatbiq etish, o‘qituvchi va murabbiylarni doimiy ravishda malakasini oshirish hamda talabalarni mustaqil ishlashini to‘g‘ri rag‘batlantirish kabi masalalarga bag‘ishlangan amaliy mashg‘ulotlar bo‘lib o‘tadi.
Eslatib o‘tamiz, ta’lim sohasidagi O‘zbekiston—Britaniya hamkorligi 1996-yili Britaniya Kengashining Toshkentdagi vakolatxonasi ochilishi va ikki mamlakat hukumatlari o‘rtasida hamkorlik Memorandumi imzolangan vaqtdan boshlangan bo‘lib, o‘tgan 19 yillik muvaffaqiyatli faoliyatni o‘z ichiga oladi.
Izoh (0)