Ispaniyaning Valensiya shahridan 40 kilometr masofada joylashgan Bunyol shaharchasida an’anaviy “La Tomatina” festivali start oldi. “Korrespondent.net”ning yozishicha, bu yil “pomidor jangi” bayramiga asos solinganiga 70 yil to‘ladi.
“Pomidor jangi” atigi bir soat davom etadi. Shahar markazidagi minoradan bayram boshlangani haqida signal berilishi bilan, bosh maydonda pishgan pomidorlar ortilgan yuk mashinalari paydo bo‘ladi — aynan pomidor asosiy qurol vazifasini o‘taydi. Jang qoidasi oddiy: pomidorni biroz siqib, imkon qadar ko‘proq odamga uloqtirish zarur.
Tadbir avgust oyining oxirgi haftasida — hosil mavsumida tashkil etiladi va yetti kun davom etadi. Bu yilgi festivalga jahonning turli burchaklaridan 40 mingga yaqin sayyoh kelishi kutilmoqda, ular bir hafta davomida 150 tonnaga yaqin pomidorni yo‘q qiladi.
“La Tomatina” festivali doirasida musiqiy chiqishlar, yarmarka, parad, raqslar va mushakbozlik ham bo‘lib o‘tadi. Festival o‘z tarixini 1945-yildan boshlaydi — shu yili shahar markazidagi norozilik namoyishi vaqtida namoyishchilar politsiyaga qarshi kurash quroli sifatida qo‘shni rastalardagi meva va sabzavotlardan foydalangan.
Izoh (0)