Lyuksemburglik dasturchi Feliks Vays o‘z oldiga bir yil davomida faqat bitkoinlar evaziga hayot kechirish, ayni vaqtda, jahon bo‘ylab sayohat qilish vazifasini qo‘ydi. TJournal’ning yozishicha, uning bu tajribasiga Reuters agentligi e’tibor qaratgan.
2015-yilning 12-yanvar kuni Vays o‘zining Bitcoin Travel nomli blogida jahon bo‘ylab 365 kunlik sayohatga chiqishni rejalashtirayotganini ma’lum qildi. U o‘zining barcha pullarini bitkoinlarga almashtirdi va kredit kartasini bo‘laklarga bo‘lib tashladi.
“Men o‘zim uchun raqamli valyutalarni 2012-yilda kashf etgandim va buni tushunib olishim uchun ma’lum bir vaqt kerak bo‘ldi, oxir-oqibat bunday pul mening hayotimni o‘zgartirib yubordi”, — deydi dasturchi.
Vays oddiy qoidalarga rioya etishga qaror qildi: qayerda ishlatish mumkin bo‘lsa, o‘sha yerda bitkoindan foydalandi, masalan, turar-joy haqini, ovqat yoki yo‘lkirani raqamli valyuta bilan to‘ladi va hech qachon debet yoki kredit kartaga yoxud bankomatlarga murojaat qilmadi. U yonida muntazam ravishda, oz bo‘lsa-da, mahalliy pul birligini ham olib yurdi, lekin, o‘zining so‘zlariga ko‘ra, bu pullar ham mahalliy aholiga bitkoin sotish orqali qo‘lga kiritilgan edi.
Dasturchining birinchi sayohat joyi Praga bo‘ldi — bu yerda u mahalliy restoranda ovqat pulini bitkoin bilan to‘ladi. Restoran xodimlari ingliz tilini bilmagani sabab, u yemak haqini qanday to‘lamoqchi ekanligini uzoq tushuntirishiga to‘g‘ri keldi. Ayni vaqtda, Vaysning fikricha, Chexiyada raqamli valyutaga jiddiy qarashadi, shu sababli ham, sayohatning dastlabki kunlari lyuksemburglik sayohatchi uchun oson kechdi.
Turkiyada esa nisbatan og‘irroq bo‘ldi — bu yerda dastlab mahalliy aholi kriptovalyutaga ishonchsizlik bilan qaradi. Vays o‘zining turk do‘sti yordamidagina turklarni bitkoinlarning ishonchli ekanligiga ishontira oldi va hatto paraplanda sayr qilish uchun bitkoinda pul to‘lashga muvaffaq bo‘ldi.
Keyingi oylar davomida dasturchi yana 14 mamlakatda, jumladan, Isroil, Ukraina va bir qator Yevropa davlatlarida bo‘ldi. U jurnalistlarga bergan intervyusida “eski zerikarli tizimga qaytishni” xohlamasligini aytib o‘tdi.
“Bitkoinlar aynan hozir davom etayotgan eng qiziqarli global ijtimoiy-iqtisodiy tajribadir. Men bunga ishonaman”, — deya qo‘shimcha qildi Feliks Vays.
Izoh (0)