Люксембурглик дастурчи Феликс Вайс ўз олдига бир йил давомида фақат биткоинлар эвазига ҳаёт кечириш, айни вақтда, жаҳон бўйлаб саёҳат қилиш вазифасини қўйди. TJournal’нинг ёзишича, унинг бу тажрибасига Reuters агентлиги эътибор қаратган.
2015 йилнинг 12 январь куни Вайс ўзининг Bitcoin Travel номли блогида жаҳон бўйлаб 365 кунлик саёҳатга чиқишни режалаштираётганини маълум қилди. У ўзининг барча пулларини биткоинларга алмаштирди ва кредит картасини бўлакларга бўлиб ташлади.
«Мен ўзим учун рақамли валюталарни 2012 йилда кашф этгандим ва буни тушуниб олишим учун маълум бир вақт керак бўлди, охир-оқибат бундай пул менинг ҳаётимни ўзгартириб юборди», — дейди дастурчи.
Вайс оддий қоидаларга риоя этишга қарор қилди: қаерда ишлатиш мумкин бўлса, ўша ерда биткоиндан фойдаланди, масалан, турар-жой ҳақини, овқат ёки йўлкирани рақамли валюта билан тўлади ва ҳеч қачон дебет ёки кредит картага ёхуд банкоматларга мурожаат қилмади. У ёнида мунтазам равишда, оз бўлса-да, маҳаллий пул бирлигини ҳам олиб юрди, лекин, ўзининг сўзларига кўра, бу пуллар ҳам маҳаллий аҳолига биткоин сотиш орқали қўлга киритилган эди.
Дастурчининг биринчи саёҳат жойи Прага бўлди — бу ерда у маҳаллий ресторанда овқат пулини биткоин билан тўлади. Ресторан ходимлари инглиз тилини билмагани сабаб, у емак ҳақини қандай тўламоқчи эканлигини узоқ тушунтиришига тўғри келди. Айни вақтда, Вайснинг фикрича, Чехияда рақамли валютага жиддий қарашади, шу сабабли ҳам, саёҳатнинг дастлабки кунлари люксембурглик саёҳатчи учун осон кечди.
Туркияда эса нисбатан оғирроқ бўлди — бу ерда дастлаб маҳаллий аҳоли криптовалютага ишончсизлик билан қаради. Вайс ўзининг турк дўсти ёрдамидагина туркларни биткоинларнинг ишончли эканлигига ишонтира олди ва ҳатто парапланда сайр қилиш учун биткоинда пул тўлашга муваффақ бўлди.
Кейинги ойлар давомида дастурчи яна 14 мамлакатда, жумладан, Исроил, Украина ва бир қатор Европа давлатларида бўлди. У журналистларга берган интервьюсида «эски зерикарли тизимга қайтишни» хоҳламаслигини айтиб ўтди.
«Биткоинлар айнан ҳозир давом этаётган энг қизиқарли глобал ижтимоий-иқтисодий тажрибадир. Мен бунга ишонаман», — дея қўшимча қилди Феликс Вайс.
Изоҳ (0)