Koreya Respublikasi va KXDR o‘rtasida Janubiy Koreya qirg‘oq soqchilari tomonidan qutqarib olingan besh nafar shimoliy koreyalik baliqchilarning vataniga qaytarilishi bilan bog‘liq mojaro avj olmoqda, deb yozadi “TASS”.
Koreya Respublikasi birlashuv vazirligi ma’lumotiga ko‘ra, baliqchilarning uch nafari Janubda qolishni istagan, Pxenyan esa ularning barchasi vataniga qaytarilishini talab qilmoqda. Shu tufayli, Shimoliy Koreya hukumati uyiga qaytishni istagan ikki fuqarosini qabul qilishdan bosh tortdi.
KXDR Janubiy Koreyada qolmoqchi bo‘lgan uch baliqchining ismini oshkor qilishni so‘rab, ularni mamlakatda qolgan qarindoshlari bilan uchrashtirmoqchi ekanligini aytdi. Biroq Janubiy Koreya hukumati bundan “gumanitar sabablarga ko‘ra” bosh tortdi.
Dvigateli to‘xtab qolib, oqim bo‘yicha suzib yurgan Shimoliy Koreya baliqchi kemasidagi besh kishi 4-iyul kuni qutqarib olingan edi.
Izoh (0)