Lyuksemburg 1-iyuldan e’tiboran keyingi yarim yil uchun Yevropa Ittifoqi raisiga aylandi. “Segodnya.ua” xabariga ko‘ra, Yevropa Ittifoqining asoschilaridan biri hisoblangan mazkur gersoglik 12-marta Yevroittifoqqa raislik qiladi.
Lyuksemburg va rasmiy Bryussel o‘rtasida mustahkam aloqalar o‘rnatilgan: bir necha yil davomida Lyuksemburg bosh vaziri sifatida ishlagan Jan-Klod Yunker 2014-yil noyabridan beri Yevrokomissiya rahbari sanaladi.
Gretsiyadagi qarz inqirozi yaqin oylar davomida Yevropa Ittifoqidagi bosh mavzu bo‘lishi kutilmoqda. Bundan tashqari, Lyuksemburg o‘z raisligi davrida iqtisodiy o‘sish va aholi bandligi ko‘rsatkichlarini oshirish, atrof-muhitni muhofaza qilish, noqonuniy muhojirlarning Yevropaga ommaviy oqib kelishi, ichki bozor va Ittifoqning tashqi siyosatdagi o‘rni kabi masalalarga ham birinchi galda e’tibor qaratish niyatida.
Lyuksemburg Yevropa Ittifoqi raisligini Latviyadan qabul qilib oldi. 2016-yil 1-yanvardan boshlab Yevropa Ittifoqi raisi lavozimi Gollandiyaga topshiriladi.
Izoh (0)