Qrim huquqni muhofaza qilish organlari 2015-yilning dastlabki olti oyida korrupsiya holatlariga aloqador 120ta jinoyat ishi ochdi. “RIA Novosti”ning Qrim prokurori Natalya Poklonskayaga asoslanib xabar qilishicha, mazkur jinoyat ishlarining yarmidan ortig‘i poraxo‘rlik bilan bog‘liq.
Korrupsiya holatlari bo‘yicha gumon qilinayotganlar orasida mahalliy politsiyaning 13 xodimi, Qrim bojxonasining ikki vakili, shuningdek, soliq xizmatining boshlig‘i bor. Jumladan, Qrim soliq xizmati rahbari Nikolay Kochanov dushanba kuni pora olayotgan vaqtida daliliy ashyo bilan qo‘lga tushdi.
Poklonskayaning qayd etishicha, Qrimning sobiq transport vaziri Anatoliy Surkin va sanoat siyosati vaziri Andrey Skrinnikka nisbatan jinoyat ishlari ochildi, Peschanoye qishloq kengashi va Kirov tumani kengashining ikki deputati, shuningdek, Qrimning uchta qishloq kengashlari ma’muriyatlari rahbarlariga qarshi tergov harakatlari olib borilmoqda.
Qrim prokuraturasining ma’lum qilishicha, turli darajadagi amaldorlarning korrupsiyaviy harakatlari natijasida davlatga yuz millionlab rubl miqdorida zarar yetkazilgan. Qayd etish joiz, seshanba kuni Qrim rahbari Sergey Aksyonov respublikada hokimiyat organlarini korrupsionerlardan tozalash ishlari olib borilayotganini ma’lum qilgandi.
Izoh (0)