“Toshkent-Aero” ixtisoslashtirilgan bojxona kompleksi xodimlari 5 oy ichida 48 marta naqd xorijiy valyutalarning noqonuniy ravishda olib o‘tilishining oldini oldi, deb xabar beradi “Toshkent-Aero” IBK axborot xizmati.
Amaldagi tartiblarga muvofiq norezidentlar ya’ni O‘zbekiston Respublikasi fuqarosi bo‘lmagan, shuningdek O‘zbekiston Respublikasida doimiy yashash joyiga ega bo‘lmagan chet ellik fuqarolarga O‘zbekistonga kirib kelish vaqtida bojxonaga taqdim etilgan deklaratsiyaga muvofiq respublikaga olib kirgan valyutasi miqdoridagi naqd xorijiy valyutani bojxona bayonnomasida yozma qayd etish sharti bilan olib chiqib ketishlariga ruxsat etiladi.
Norezident tomonidan yo‘lovchi bojxona deklaratsiyasida (olib kirish paytida to‘ldirilgan va bojxona organining xodimi tomonidan tasdiqlangan) yoki TS-28 guvohnomasida (5 ming AQSh dollariga ekvivalent miqdordan oshadigan hajmda naqd chet el valyutasi olib kirilishi paytida bojxona organi tomonidan berilgan) ko‘rsatilgan summadan ortiqcha naqd chet el valyutasini olib chiqish uchun faqatgina O‘zbekiston Respublikasi Markaziy banki yoki xorijiy valyuta bilan operatsiyalarni o‘tkazishga asosiy litsenziyasi bo‘lgan vakolatli banklar tomonidan beriladigan ruxsatnoma asos bo‘lib hisoblanadi.
Ammo, qozog‘istonlik Sh.Kalmuratov (maqoladagi barcha ism-shariflar o‘zgartirilgan) mazkur qoidalarni mensimadi. U Toshkentdan turib, Seulga parvoz qilish oldidan yo‘lovchi bojxona bayonnomasida va bojxona xodimlarining og‘zaki so‘rovi paytida ma’lum qilmasdan turib, 2 ming AQSh dollarini olib chiqishga uringan paytda to‘xtatib qolindi.
Kiyevga parvoz oldidan ukrainalik L.Djumayeva 3300 dollarini sumkasining ko‘z ilg‘amas cho‘ntagiga yashirgancha bojxonadan olib o‘tishga uringanda ushlandi.
O‘zbekistondan o‘z shahriga qaytayotgan urumchilik A.Godun 2200 AQSh dollari va 4200 Xitoy yuanini qo‘l yuklariga yashirgancha olib chiqishga uringan paytda fosh qilindi.
“Toshkent-Irkutsk” reysi bo‘yicha parvozga shaylangan K.Sergeyga esa o‘zi tashrif buyurgan mamlakat tartiblarini mensimagani qimmatga tushdi! Natijada, u ona shahriga parvoz oldidan yashirincha olib chiqishga uringan 3650 AQSh dollari bilan “xayrlashishi”ga to‘g‘ri keldi.
Nijniy Novgorodlik T.Liliyaga bojxona nazoratidan bekitgan holda olib chiqib ketish uchun 3760 AQSh dollarini qo‘l sumkasi va yuklari orasiga yashirish ishonchsizroq usuldek tuyuldi. Go‘yoki, ishning ko‘zini biladigan bu ayol naqd xorijiy valyutalarni egnidagi ichki kiyimlari orasiga yashirdi. Ammo, shaxsiy ko‘rik davomida bojxonachilar uning qonunga zid harakatlariga nuqta qo‘ydi.
Hozirda yuqoridagi holatlar yuzasidan bojxona tekshiruvlari va surishtiruv jarayonlari davom ettirilmoqda.
Raqamlarga ko‘ra, joriy yilning o‘tgan 5 oyi davomida “Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda aniqlangan 48 ta bojxona qoidabuzarliklari natijasida chet ellik fuqarolar tomonidan 73,3 mingdan ortiq AQSh dollari, salkam 12 ming yevro, 462 mingdan ortiq Rossiya rubli va boshqa naqd xorijiy valyutalarning noqonuniy ravishda olib o‘tilishining oldi olindi.
Izoh (0)