«Тошкент-Аэро» ихтисослаштирилган божхона комплекси ходимлари 5 ой ичида 48 марта нақд хорижий валюталарнинг ноқонуний равишда олиб ўтилишининг олдини олди, деб хабар беради «Тошкент-Аэро» ИБК ахборот хизмати.
Амалдаги тартибларга мувофиқ норезидентлар яъни Ўзбекистон Республикаси фуқароси бўлмаган, шунингдек Ўзбекистон Республикасида доимий яшаш жойига эга бўлмаган чет эллик фуқароларга Ўзбекистонга кириб келиш вақтида божхонага тақдим этилган декларацияга мувофиқ республикага олиб кирган валютаси миқдоридаги нақд хорижий валютани божхона баённомасида ёзма қайд этиш шарти билан олиб чиқиб кетишларига рухсат этилади.
Норезидент томонидан йўловчи божхона декларациясида (олиб кириш пайтида тўлдирилган ва божхона органининг ходими томонидан тасдиқланган) ёки ТS-28 гувоҳномасида (5 минг АҚШ долларига эквивалент миқдордан ошадиган ҳажмда нақд чет эл валютаси олиб кирилиши пайтида божхона органи томонидан берилган) кўрсатилган суммадан ортиқча нақд чет эл валютасини олиб чиқиш учун фақатгина Ўзбекистон Республикаси Марказий банки ёки хорижий валюта билан операцияларни ўтказишга асосий лицензияси бўлган ваколатли банклар томонидан бериладиган рухсатнома асос бўлиб ҳисобланади.
Аммо, қозоғистонлик Ш.Калмуратов (мақоладаги барча исм-шарифлар ўзгартирилган) мазкур қоидаларни менсимади. У Тошкентдан туриб, Сеулга парвоз қилиш олдидан йўловчи божхона баённомасида ва божхона ходимларининг оғзаки сўрови пайтида маълум қилмасдан туриб, 2 минг АҚШ долларини олиб чиқишга уринган пайтда тўхтатиб қолинди.
Киевга парвоз олдидан украиналик Л.Джумаева 3300 долларини сумкасининг кўз илғамас чўнтагига яширганча божхонадан олиб ўтишга уринганда ушланди.
Ўзбекистондан ўз шаҳрига қайтаётган урумчилик А.Годун 2200 АҚШ доллари ва 4200 Хитой юанини қўл юкларига яширганча олиб чиқишга уринган пайтда фош қилинди.
«Тошкент-Иркуцк» рейси бўйича парвозга шайланган К.Сергейга эса ўзи ташриф буюрган мамлакат тартибларини менсимагани қимматга тушди! Натижада, у она шаҳрига парвоз олдидан яширинча олиб чиқишга уринган 3650 АҚШ доллари билан «хайрлашиши»га тўғри келди.
Нижний Новгородлик Т.Лилияга божхона назоратидан бекитган ҳолда олиб чиқиб кетиш учун 3760 АҚШ долларини қўл сумкаси ва юклари орасига яшириш ишончсизроқ усулдек туюлди. Гўёки, ишнинг кўзини биладиган бу аёл нақд хорижий валюталарни эгнидаги ички кийимлари орасига яширди. Аммо, шахсий кўрик давомида божхоначилар унинг қонунга зид ҳаракатларига нуқта қўйди.
Ҳозирда юқоридаги ҳолатлар юзасидан божхона текширувлари ва суриштирув жараёнлари давом эттирилмоқда.
Рақамларга кўра, жорий йилнинг ўтган 5 ойи давомида «Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 48 та божхона қоидабузарликлари натижасида чет эллик фуқаролар томонидан 73,3 мингдан ортиқ АҚШ доллари, салкам 12 минг евро, 462 мингдан ортиқ Россия рубли ва бошқа нақд хорижий валюталарнинг ноқонуний равишда олиб ўтилишининг олди олинди.
Изоҳ (0)