Andijonda ayolni “samosud” qilgan do‘kon egasiga jinoyat ishi qo‘zg‘atildi

Andijon viloyatida boshqa bir ayolga nisbatan zo‘ravonlik qilgan ayolga jinoyat ishi qo‘zg‘atildi. Bu haqda viloyat IIB matbuot xizmati xabar berdi.

22-iyul kuni ijtimoiy tarmoqlarda ushbu ayolning boshqa ayolni “samosud” qilgani videosi tarqalib, jamoatchilik eʼtiroziga sabab bo‘lgandi. Andijon shahri, “Hunarmand” mahallasida joylashgan kiyim savdosi bilan shug‘ullanuvchi do‘kon egasi bo‘lgan 1992-yilda tug‘ilgan ayol  A.P. qo‘l ostida sotuvchi bo‘lib ishlovchi 2005-yilda tug‘ilgan S.S. o‘rtasida sodir bo‘lgan. O‘zaro qarz oldi-berdi masalasi ortidan do‘kon egasi sotuvchi qizga nisbatan tazyiq va zo‘ravonlik kabi xatti-harakatlarni sodir etgan.

Ushbu holat yuzasidan Andijon viloyati IIB huzuridagi Tergov boshqarmasi tomonidan Jinoyat kodeksining 138-moddasi 2-qismi (zo‘rlik ishlatib g‘ayriqonuniy ravishda ozodlikdan mahrum qilish) bilan jinoyat ishi qo‘zg‘atilib, fuqaro A.P. protsessual tartibda ushlandi.

Tergov ishi Andijon viloyati prokuraturasi tomonidan nazoratga olingan.

Andijon viloyati IIB ushbu suratdagi ayolning noqonuniy xatti-harakatlaridan jabrlanganlar 102 qisqa raqamiga, Andijon shahri bo‘yicha IIO FMBning telefon raqamiga 74-223-59-52 yoki yaqin oradagi ichki ishlar bo‘limlariga murojaat qilishlarini so‘radi.