Surxondaryo viloyati Angor tumanida yashovchi 78 yoshli Egamurod Choriyev Termiz—Toshkent—Chimkent yo‘nalishi bo‘yicha velosipedda deyarli 2000 km masofani bosib o‘tdi, deya xabar bermoqda “Gazeta.uz” “Narodnoye slovo”ga tayanib.
Velosipedda uzoq masofani bosib o‘tishga Choriyev 9-may — Xotira va qadrlash kuni qaror qildi. Uni yo‘lga ko‘p sonli qarindosh va yaqinlari kuzatib qoldi.
Egamurod bobo Toshkentga yetti kunda yetib keldi, Qozog‘istonning Chimkent shahrigacha borishga bir-ikki kun ketdi. Termizga velosipedchi 27-mayda — startdan 18 kun o‘tib qaytib keldi. Uni jamoatchilik vakillari “O‘zbekturizm” mintaqaviy vakili boshchiligida kutib oldi.
“Sayohat davomida ko‘plab mehribon odamlar bilan uchrashish nasib qildi, — dedi velosipedchi. — Safardan horib-charchab, biroq juda mamnun holda qaytdim”.
Uzoq yillar davomida Egamurod Choriyev agrar sohada ishladi va doimiy ravishda velosipeddan foydalandi. Pensiyaga chiqqach ham oqsoqol “temir tulpor”ini minishni kanda qilmadi. U gimnastika bilan shug‘ullanadi, to‘g‘ri ovqatlanadi va muntazam ravishda shifokor qabulida bo‘ladi.
Izoh (0)