Сурхондарё вилояти Ангор туманида яшовчи 78 ёшли Эгамурод Чориев Термиз—Тошкент—Чимкент йўналиши бўйича велосипедда деярли 2000 км масофани босиб ўтди, дея хабар бермоқда «Газета.uz» «Народное слово»га таяниб.
Велосипедда узоқ масофани босиб ўтишга Чориев 9 май — Хотира ва қадрлаш куни қарор қилди. Уни йўлга кўп сонли қариндош ва яқинлари кузатиб қолди.
Эгамурод бобо Тошкентга етти кунда етиб келди, Қозоғистоннинг Чимкент шаҳригача боришга бир-икки кун кетди. Термизга велосипедчи 27 майда — стартдан 18 кун ўтиб қайтиб келди. Уни жамоатчилик вакиллари «Ўзбектуризм» минтақавий вакили бошчилигида кутиб олди.
«Саёҳат давомида кўплаб меҳрибон одамлар билан учрашиш насиб қилди, — деди велосипедчи. — Сафардан ҳориб-чарчаб, бироқ жуда мамнун ҳолда қайтдим».
Узоқ йиллар давомида Эгамурод Чориев аграр соҳада ишлади ва доимий равишда велосипеддан фойдаланди. Пенсияга чиққач ҳам оқсоқол «темир тулпор»ини минишни канда қилмади. У гимнастика билан шуғулланади, тўғри овқатланади ва мунтазам равишда шифокор қабулида бўлади.
Изоҳ (0)