O‘zbekiston OTMlari o‘qituvchilari muntazam ravishda qayta tayyorlash jarayonidan o‘tadi

O‘zbekiston Prezidenti Islom Karimov 12-iyun kuni “Oliy ta’lim muassasalarining rahbar va pedagog kadrlarini qayta tayyorlash va malakasini oshirish tizimini yanada takomillashtirish chora-tadbirlari to‘g‘risida”gi farmonni imzoladi. Farmon matni O‘zAda e’lon qilingan.

Hujjat oliy o‘quv yurtlari professor-o‘qituvchilarining kasb darajasi va malakasini muttasil oshirib borish asosida yuqori malakali mutaxassislar tayyorlash sifatini tubdan oshirish maqsadida qabul qilingan.

Farmonga muvofiq, idoraviy mansubligidan qat’i nazar, O‘zbekiston oliy ta’lim muassasalarining rahbar va pedagog kadrlari uch yilda kamida bir marta doimiy asosda 15ta tayanch oliy o‘quv yurtlarining doimiy faoliyat ko‘rsatadigan kurslarida qayta tayyorlashning tegishli yo‘nalishlari bo‘yicha qayta tayyorlanishi va malakasini oshirishi shart.

Qayta tayyorlash va malaka oshirish kurslarida o‘qish oliy o‘quv yurtlarining rahbar va pedagog kadrlarini qayta tayyorlash kursi o‘quv rejasining yangilangan namunali tuzilmasi asosida ishlab chiqilgan 288 soatlik maxsus dasturlar bo‘yicha ikki oy davomida ishdan ajragan holda amalga oshiriladi.

Kurslar yakunida tinglovchilar har bir tayanch oliy o‘quv yurtida tashkil etiladigan oliy o‘quv yurti rektori yoki Fan doktori ilmiy darajasini berish bo‘yicha ilmiy kengash raisi rahbarligidagi ilmiy kengash a’zolari, o‘quv-uslubiy ishlar sohasidagi yirik mutaxassislardan tashkil topgan kamida yetti kishidan iborat Attestatsiya komissiyalari tomonidan o‘tkaziladigan attestatsiyadan o‘tadi.

Attestatsiyadan o‘tolmaganlar takroriy qayta tayyorlash va attestatsiyadan o‘tishi shart. Takroriy attestatsiyadan o‘tolmagan taqdirda, ular oliy ta’lim muassasalarida o‘qituvchilik faoliyati bilan shug‘ullanish huquqini yo‘qotadi va ular bilan asosiy ish joyi bo‘yicha mehnat shartnomasi bekor qilinadi.

Oliy o‘quv yurtlarining rahbar va pedagog kadrlarini qayta tayyorlash va malakasini oshirish bo‘yicha doimiy faoliyat ko‘rsatadigan kurslar faoliyati 2015-yilning 1-sentyabridan tashkil etish rejalashtirilgan.

Attestatsiyadan o‘tkazish jarayonlarini tashkil etish borasidagi ishlarni aniq va samarali muvofiqlashtirish uchun Vazirlar Mahkamasi huzurida doimiy faoliyat yuritadigan Idoralararo komissiya tashkil etiladi.