Hindistonda yomg‘ir chaqirish uchun erkak kishi qurbon qilindi

Hindistonda yomg‘ir chaqirish va mo‘l hosil olishni ta’minlash uchun erkakning boshi olindi, deb xabar qiladi “Vostochniy Ekspress”.

Qurbonlik marosimi mamlakat sharqidagi Jarkxand shtatida sodir etildi. 55 yoshli Txepa Kariyning jasadi uning o‘z uyidan topildi. Politsiya ma’lumotiga ko‘ra, 31-may kuni erkak o‘ldirilgan, uning boshi esa olib ketilgan.

Qotillikni “mudkatva” sektasi tarafdorlari sodir etganligi taxmin qilinmoqda. Bu guruh qurbonlarning boshini uzib olib, yomg‘ir chaqirish va mo‘l hosilga erishish uchun sholi maydonlariga ko‘mib qo‘yadi. Tartib posbonlari ularga qarshi kampaniyani boshladi.

“Mudkatva” oqimi Jarkxandda bir necha yuz yillardan beri mavjud. Shtatda boshni tanasidan judo qilish hollari tez-tez kuzatib turiladi. Mahalliy aholi keyingi qurbon o‘zi bo‘lmasligi uchun ulardan shikoyat qilmaslikni ma’qul ko‘radi.