ФИФА президенти Йозеф Блаттер коррупцион можаро сабаб истеъфога чиқишини эълон қилди. Meduza.io хабарига кўра, ташкилотнинг янги раҳбарини сайлаш учун ФИФАнинг навбатдан ташқари конгресси чақирилади.
«Менга ФИФА томонидан мандат (ишонч) билдирилган бўлса-да, мен бутун футбол дунёсининг ишончини ҳис қилаётганим йўқ», - деди Блаттер.
ФИФА вакили Доменико Скаланинг маълум қилишича, ташкилотнинг навбатдан ташқари конгресси 2015 йилнинг декабридан 2016 йилнинг мартига қадар бўлган оралиқда чақирилади.
«ФИФА манфаатлари мен учун муҳим. Шу сабабли ҳам мен истеъфо ҳақидаги қарорни қабул қилдим», - деди Блаттер.
Blatter departs. pic.twitter.com/areGUTZysE
— Richard Conway (@richard_conway) June 2, 2015
Йозеф Блаттер 1998 йилдан бери ФИФАга раҳбарлик қилиб келаётганди. 29 май куни у навбатдаги муддатга сайланган эди.
ФИФА президенти сайлови арафасида, 28 май куни АҚШнинг сўрови асосида Цюрихдаги меҳмонхонада ФИФАнинг етти нафар юқори мартабали вакили ҳибсга олинди. Уларни 20 йил давомида ФИФА ходими сифатида пора олганликда айблашмоқда.
Шу билан бирга, Швейцария 2018- ва 2022 йилги жаҳон чемпионатлари мезбонлигини мос равишда Россия ва Қатарга берилиши юзасидан тергов ҳаракатларини бошлади.
Изоҳ (0)