O‘tgan kunning eng ommabop xabarlari bilan tanishing

Tokio yaqinida 8,5 magnitudalik zilzila sodir bo‘ldi

Silkinish Xonsyu orolining deyarli barcha hududlarida sezilgan. Zilzila o‘chog‘i dengiz tubidan 500 kilometr chuqurlikda, Ogasavara oroli yaqinida bo‘lgan. Tokioda devorlar qimirlagani qayd etilgan, tezyurar poyezdlar harakati vaqtincha to‘xtatilgan.

FIFA Indoneziyaning tashkilotga a’zoligini to‘xtatdi

Bu haqdagi qaror may oyi oxirida Syurixda bo‘lib o‘tgan FIFA ijroqo‘mi majlisida qabul qilingan. Avvalroq FIFA mahalliy futbol federatsiyasi va mamlakat sport vazirligi o‘rtasidagi nizo sabab Indoneziya futbol federatsiyasiga nisbatan sanksiyalar qo‘llashi mumkinligi ma’lum bo‘lgandi.

Chagayev jamoasi Nyu-York sudi qaroriga qarshi apellyatsiya beradi

O‘zbekistonlik bokschi Ruslan Chagayevning promouteri Timur Dugazayev Nyu-York sudining Fres Okendo bo‘yicha qaroriga apellyatsiya berishini ma’lum qildi. Okendo revansh jangini istayapti. Biroq Chagayev iyulda Franchesko Pyanetta bilan jang qilishga rozi bo‘lgan. Chagayev tomoni Moskva sudiga ushbu qaror yuzasidan ariza tashlagan.

O‘zbekistonda tadbirkorlar ruxsat beruvchi hujjatlarni rasmiylashtirish uchun internet orqali murojaat qilishi mumkin

Vazirlar Mahkamasining 2013-yil 25-noyabrdagi “Tadbirkorlik subyektlarini internet tarmog‘i orqali davlat ro‘yxatidan o‘tkazish mexanizmini joriy etish chora-tadbirlari to‘g‘risida”gi qaroriga asosan tadbirkorlik subyektlari nafaqat davlat ro‘yxatidan o‘tish uchun, balki ruxsat beruvchi hujjatlarni rasmiylashtirish uchun ham internet tarmog‘i orqali murojaat qilishi mumkinligi belgilandi.

Qoraqalpog‘istonda Jahon bankining 376,7 million dollarlik loyihasi amalga oshiriladi

Loyiha doirasida Beruniy, To‘rtko‘l va Ellikqal’a tumanlarida suv ta’minotini yaxshilash maqsadida, uzunligi 70 kilometrga, o‘tkazish imkoniyati esa soniyasiga 105 kub metr suvga teng “Bo‘ston” betonli magistral kanalini qurish, uzunligi 31,1 kilometr, o‘tkazish imkoniyati soniyasiga 160 kub metr suv bo‘lgan Tuyamo‘yin magistral kanalini, uzunligi 27,5 kilometrga teng “Paxta-arna” magistral kanalini, 375-kilometrli xo‘jaliklararo kanallarni rekonstruksiya qilish va ularning gidrotexnik inshootlarini ta’mirlash ko‘zda tutilgan.