Ўтган куннинг энг оммабоп хабарлари билан танишинг

Токио яқинида 8,5 магнитудалик зилзила содир бўлди

Силкиниш Хонсю оролининг деярли барча ҳудудларида сезилган. Зилзила ўчоғи денгиз тубидан 500 километр чуқурликда, Огасавара ороли яқинида бўлган. Токиода деворлар қимирлагани қайд этилган, тезюрар поездлар ҳаракати вақтинча тўхтатилган.

ФИФА Индонезиянинг ташкилотга аъзолигини тўхтатди

Бу ҳақдаги қарор май ойи охирида Цюрихда бўлиб ўтган ФИФА ижроқўми мажлисида қабул қилинган. Аввалроқ ФИФА маҳаллий футбол федерацияси ва мамлакат спорт вазирлиги ўртасидаги низо сабаб Индонезия футбол федерациясига нисбатан санкциялар қўллаши мумкинлиги маълум бўлганди.

Чагаев жамоаси Нью-Йорк суди қарорига қарши апелляция беради

Ўзбекистонлик боксчи Руслан Чагаевнинг промоутери Тимур Дугазаев Нью-Йорк судининг Фрес Окендо бўйича қарорига апелляция беришини маълум қилди. Окендо реванш жангини истаяпти. Бироқ Чагаев июлда Франческо Пьянетта билан жанг қилишга рози бўлган. Чагаев томони Москва судига ушбу қарор юзасидан ариза ташлаган.

Ўзбекистонда тадбиркорлар рухсат берувчи ҳужжатларни расмийлаштириш учун интернет орқали мурожаат қилиши мумкин

Вазирлар Маҳкамасининг 2013 йил 25 ноябрдаги «Тадбиркорлик субъектларини интернет тармоғи орқали давлат рўйхатидан ўтказиш механизмини жорий этиш чора-тадбирлари тўғрисида»ги қарорига асосан тадбиркорлик субъектлари нафақат давлат рўйхатидан ўтиш учун, балки рухсат берувчи ҳужжатларни расмийлаштириш учун ҳам интернет тармоғи орқали мурожаат қилиши мумкинлиги белгиланди.

Қорақалпоғистонда Жаҳон банкининг 376,7 миллион долларлик лойиҳаси амалга оширилади

Лойиҳа доирасида Беруний, Тўрткўл ва Элликқалъа туманларида сув таъминотини яхшилаш мақсадида, узунлиги 70 километрга, ўтказиш имконияти эса сониясига 105 куб метр сувга тенг «Бўстон» бетонли магистрал каналини қуриш, узунлиги 31,1 километр, ўтказиш имконияти сониясига 160 куб метр сув бўлган Туямўйин магистрал каналини, узунлиги 27,5 километрга тенг «Пахта-арна» магистрал каналини, 375-километрли хўжаликлараро каналларни реконструкция қилиш ва уларнинг гидротехник иншоотларини таъмирлаш кўзда тутилган.