Italiya sobiq bosh vaziri, o‘ng-markazchi “Olg‘a, Italiya” partiyasi yetakchisi Silvio Berluskoni xatolik sabab mahalliy saylovlardagi siyosiy raqiblarining nomzodini qo‘llab, nutq so‘zladi. "TASS"ning xabar berishicha, hodisa Milan yaqinidagi Segrata shahrida yuz bergan.
So‘l-markazchi ro‘yxatdan shahar merligiga nomzod Paolo Mikelining so‘zlariga ko‘ra, Berluskonining korteji Mikelini qo‘llab-quvvatlash uchun yoshlar uchun namoyish etilgan maydonga kelgan. Sobiq bosh vazir mashinadan tushib, maydondagi stendlar bilan tanishgan va bir qator yoshlar bilan so‘zlashib, ular qo‘llayotgan nomzodning ismini so‘ragan. “Paolo Mikeli” degan javobni olib, Berluskoni yoshlarga “yakshanba kuni bir soat vaqt topib, Paologa ovoz berishga” chaqirgan. Ko‘p o‘tmay, guvohlarning so‘zlariga ko‘ra, siyosatchining yordamchilari xato bo‘lganini tushunib yetishgan – “Olg‘a, Italiya” partiyasi tomonidan qo‘llab-quvvatlangan nomzod ayol kishi bo‘lib, Tekla Fraskini boshqa maydonda uchrashuv o‘tkazayotgan edi.
Shaharning amaldagi meri Adriano Alessandrinining so‘zlariga ko‘ra, 35 mingga yaqin aholi yashaydigan shahar uchun Berluskonining o‘zi kelgani ham katta gap. Sobiq bosh vazir o‘z partiyasiga yetakchilik qilishda va mahalliy saylovlarda partiyadan nomzodlarni qo‘llab-quvvatlashda faol ishtirok etmoqda.
Izoh (0)