BMT bosh kotibi Pan Gi Mun KXDR hukumati uning Keson industrial majmuasiga tashrifiga rozilik bildirmaganini ma’lum qildi, deb yozadi “TASS” Yonhap agentligiga tayanib.
“Avvalroq KXDR hukumati diplomatik kanallar orqali bizni mening Keson industrial majmuasiga tashrifim bo‘yicha o‘z fikrlarini o‘zgartirgani haqida xabardor qilgan edi”, — dedi Pan Gi Mun. Uning aniqlik kiritishicha, Pxenyan so‘nggi daqiqadagi bu o‘zgarishga hech qanday izoh bermagan.
19-mayda Inchxondagi matbuot anjumanida BMT bosh kotibi Janubiy Koreya bilan chegarada joylashgan Keson industrial majmuasiga 21-may kuni safar uyushtirishini e’lon qilgan edi. U o‘z tashrifi iqtisodiy va boshqa sohalardagi aloqalarning rivojlanishiga ijobiy turtki berishiga umid qilgan edi.
Pan Gi Mun shuningdek, u 20 yildan buyon KXDR tuprog‘iga qadam qo‘ygan ilk bosh kotib bo‘lishi kerakligini ta’kidlagan edi. Mamlakatga tashrif buyurgan (1993-yilda) so‘nggi bosh kotib Butros Butros Gali bo‘lgan.
Izoh (0)