Россия Афғонистонга ҳарбий техника ва қуролларни транзит қилишни тўхтатади

Россия ўз ҳудуди орқали Афғонистонга ҳарбий техника ва қуролларни транзит қилишни тўхтатади. Meduza.io’нинг хабар беришича, тегишли қарор Россия бош вазири Дмитрий Медведев томонидан имзоланган.

Қарорга асосан Россия Ташқи ишлар вазирлигига хорижий мамлакатлар ва халқаро ташкилотларни «Афғонистондаги Хавфсизликни таъминлашга кўмаклашувчи халқаро кучларга Россия орқали қуроллар, ҳарбий техника ва ҳарбий мулкларни транзит қилиш бекор қилингани» ҳақида хабардор қилиш ҳақида кўрсатма берилган.

«Интерфакс» ахборот агентлигининг қайд этишича, Россия ҳукуматининг ушбу қарори БМТ Хавфсизлик кенгашининг 1386-резолюцияси талабларининг амал қилиши тўхтатилгани муносабати билан қабул қилинган.

Афғонистондаги халқаро коалицияга юкларни етказишда Россия ҳудудидан транзит сифатида фойдаланиш тўғрисидаги Россия ва НАТО ўртасида битим 2008 йил апрелида имзоланган эди. Унга кўра, йилига 4,5 минг рейс билан Америка юклари Россиядан транзит орқали Афғонистонга етказиб берилиши керак эди.

БМТ Хавфсизлик кенгаши томонидан 2001 йил декабрида қабул қилинган 1386-резолюция Афғонистонда Хавфсизликни таъминлашга кўмаклашувчи халқаро кучларни ташкил этишга рухсат берган эди. Резолюциянинг амал қилиши 2014 йил декабрида тугади. 2015 йилдан бошлаб халқаро кучларнинг Афғонистонда туриши бошқа ҳужжатлар асосида тартибга солинмоқда.