Islomobod oliy sudi Pokiston sobiq prezidenti Parvez Musharrafni hibsga olish haqida avvalroq berilgan orderni bekor qildi. Bu haqda Pokistonning Dawn gazetasiga asoslanib, “TASS” xabar bermoqda.
Sobiq prezidentga 27-aprel kuni bo‘ladigan sud majlisiga kelish shartligi haqida ko‘rsatma berilgan. Agar Musharraf ushbu buyruqqa bo‘ysunmasa, u holda order yana kuchga kiradi.
Musharrafni hibsga olish haqidagi qaror sobiq prezident diniy arbob Abdul Rashid G‘oziyning o‘limi yuzasidan ochilgan jinoyat ishining birorta sud majlisiga kelmaganidan so‘ng qabul qilingan edi.
Abdul Rashid G‘oziy 2007-yili maxsus kuchlar tomonidan Qizil masjidda ro‘y bergan isyonni bostirish vaqtida halok bo‘lgandi.
Eslatib o‘tamiz, 2007-yil 3-iyun kuni Qizil masjid tashrifchilari Pokiston huquqiy maydonidan chiqib, o‘z hududlarida shariat qoidalarini joriy etishlarini e’lon qilishgandi.
Hukumat maxsus kuchlari tomonidan o‘tkazilgan operatsiya natijasida 100 kishi, xususan, masjid rahbari G‘oziy, uning onasi va jiyani halok bo‘lgandi.
Ayblanuvchilari orasida mamlakatning o‘sha vaqtdagi prezidenti hisoblangan Parvez Musharraf ham bo‘lgan jinoyat ishi esa 2013-yil sentabrida, masjid rahbarining o‘g‘li Xorun Rashid G‘oziy talabi bilan qo‘zg‘atilgandi.
Izoh (0)