Исломобод олий суди Покистон собиқ президенти Парвез Мушаррафни ҳибсга олиш ҳақида аввалроқ берилган ордерни бекор қилди. Бу ҳақда Покистоннинг Dawn газетасига асосланиб, ТАСС хабар бермоқда.
Собиқ президентга 27 апрель куни бўладиган суд мажлисига келиш шартлиги ҳақида кўрсатма берилган. Агар Мушарраф ушбу буйруққа бўйсунмаса, у ҳолда ордер яна кучга киради.
Мушаррафни ҳибсга олиш ҳақидаги қарор собиқ президент диний арбоб Абдул Рашид Ғозийнинг ўлими юзасидан очилган жиноят ишининг бирорта суд мажлисига келмаганидан сўнг қабул қилинган эди.
Абдул Рашид Ғозий 2007 йили махсус кучлар томонидан Қизил масжидда рўй берган исённи бостириш вақтида ҳалок бўлганди.
Эслатиб ўтамиз, 2007 йил 3 июнь куни Қизил масжид ташрифчилари Покистон ҳуқуқий майдонидан чиқиб, ўз ҳудудларида шариат қоидаларини жорий этишларини эълон қилишганди.
Ҳукумат махсус кучлари томонидан ўтказилган операция натижасида 100 киши, хусусан, масжид раҳбари Ғозий, унинг онаси ва жияни ҳалок бўлганди.
Айбланувчилари орасида мамлакатнинг ўша вақтдаги президенти ҳисобланган Парвез Мушарраф ҳам бўлган жиноят иши эса 2013 йил сентябрида, масжид раҳбарининг ўғли Хорун Рашид Ғозий талаби билан қўзғатилганди.
Изоҳ (0)