20-fevral kuni Samarqand avtomobil zavodining ishlab chiqarish liniyasidan yubileyli yigirma minginchi avtomobilning tushirilishi va foydalanishga topshirilishiga bag‘ishlangan tantali tadbir bo‘lib o‘tdi. Zavodning yigirma mingingchi avtomobili sifatida siqilgan tabiiy gazda (STG) harakatlanuvchi Isuzu NPR82 mashinasi namoyon bo‘ldi.
Avtomobilning taqdimot marosimida Isuzu Motors, Itochu Corporation va “O‘zAvtosanoat” aksiyadorlik kompaniyalarining rahbarlari ishtirok etdi. Tadbir davomida mehmonlar mahsulotning yuqori texnologik ko‘rsatkichlari va zamonaviy ko‘rinishi bilan bir qatorda, mazkur tijoriy avtomobil turining mamlakatimiz iqtisodiyoti rivojlanishiga qo‘shayotgan hissasi borasida ham to‘xtalib o‘tdi.
Samarqand avtomobil zavodi siqilgan tabiiy gazda ishlovchi dvigatellar o‘rnatilgan avtomobillarni 2011-yilda Respublika hukumati qarori asosida ishlab chiqara boshladi. Jahon miqyosida tabiiy gazni avtomobil yoqilg‘isi sifatida ishlatish tendensiyasining keng tarqalishiga asosiy sabab, ushbu turdagi yoqilg‘ining nisbatan arzon tannarxi va havoga ajralayotgan gazlar toksik darajasining pastligidir.
Samarqand avtomobil zavodi 2014—2015-yillar oralig‘ida bir mingdan ziyodroq siqilgan tabiiy gazda harakatlanuvchi chiqindi tashish avtomobillarini ishlab chiqarish uchun buyurtma oldi. Bundan tashqari, zavod siqilgan tabiiy gazda ishlovchi yana uch xil kuzovga ega avtomobillar: furgon, bortli va o‘zi-ag‘dargichlarni ishlab chiqarishni o‘zlashtirdi.
Samarqand avtomobil zavodi (“SamAvto” MChJ) – avtobuslar, yuk tashish va maxsus avtomobillar ishlab chiqarish zavodidir. O‘zining tijoriy faoliyatini 1999-yilning mart oyidan boshlagan. 2006-yilda “SamKochavto” qo‘shma korxonasi “Samarqand avtomobil zavodi” MChJ (“SamAvto” MChJ) nomi ostida qayta tashkil etildi va Yaponiyaning Isuzu Motors Ltd kompaniyasi bilan hamkorlikni yo‘lga qo‘ydi. 2007-yilning yanvar oyidan boshlab SamAvto zavodining ishlab chiqarish quvvatlarida Isuzu shassisi asosida harakatlanuvchi tijoriy avtomobillarni ishlab chiqarish yo‘lga qo‘yildi.
Izoh (0)