«СамАвто»да 20 мингинчи автомобиль чиқарилди (фото)

20 февраль куни Самарқанд автомобиль заводининг ишлаб чиқариш линиясидан юбилейли йигирма мингинчи автомобилнинг туширилиши ва фойдаланишга топширилишига бағишланган тантали тадбир бўлиб ўтди. Заводнинг йигирма мингингчи автомобили сифатида сиқилган табиий газда (СТГ) ҳаракатланувчи Isuzu NPR82 машинаси намоён бўлди.

Автомобильнинг тақдимот маросимида Isuzu Motors, Itochu Corporation ва «ЎзАвтосаноат» акциядорлик компанияларининг раҳбарлари иштирок этди. Тадбир давомида меҳмонлар маҳсулотнинг юқори технологик кўрсаткичлари ва замонавий кўриниши билан бир қаторда, мазкур тижорий автомобиль турининг мамлакатимиз иқтисодиёти ривожланишига қўшаётган ҳиссаси борасида ҳам тўхталиб ўтди.

Самарқанд автомобиль заводи сиқилган табиий газда ишловчи двигателлар ўрнатилган автомобилларни 2011 йилда Республика ҳукумати қарори асосида ишлаб чиқара бошлади. Жаҳон миқёсида табиий газни автомобиль ёқилғиси сифатида ишлатиш тенденциясининг кенг тарқалишига асосий сабаб, ушбу турдаги ёқилғининг нисбатан арзон таннархи ва ҳавога ажралаётган газлар токсик даражасининг пастлигидир.

Самарқанд автомобиль заводи 2014—2015 йиллар оралиғида бир мингдан зиёдроқ сиқилган табиий газда ҳаракатланувчи чиқинди ташиш автомобилларини ишлаб чиқариш учун буюртма олди. Бундан ташқари, завод сиқилган табиий газда ишловчи яна уч хил кузовга эга автомобиллар: фургон, бортли ва ўзи-ағдаргичларни ишлаб чиқаришни ўзлаштирди.

Самарқанд автомобиль заводи («СамАвто» МЧЖ) – автобуслар, юк ташиш ва махсус автомобиллар ишлаб чиқариш заводидир. Ўзининг тижорий фаолиятини 1999 йилнинг март ойидан бошлаган. 2006 йилда «СамКочавто» қўшма корхонаси «Самарқанд автомобиль заводи» МЧЖ («СамАвто» МЧЖ) номи остида қайта ташкил этилди ва Япониянинг Isuzu Motors Лтд компанияси билан ҳамкорликни йўлга қўйди. 2007 йилнинг январь ойидан бошлаб СамАвто заводининг ишлаб чиқариш қувватларида Isuzu шассиси асосида ҳаракатланувчи тижорий автомобилларни ишлаб чиқариш йўлга қўйилди.