Yevropa ittifoqi va O‘zbekiston 18-noyabr kuni Bryusselda Adliya, ichki ishlar va inson huquqlari bo‘yicha kichik qo‘mitaning 11-majlisi doirasida Inson huquqlari bo‘yicha muzokaralarning sakkizinchi davrasini o‘tkazdi. Bu haqda YeI matbuot xizmatiga tayanib, “Gazeta.uz” xabar berdi.
Muzokaralarda O‘zbekiston delegatsiyasiga adliya vaziri Nig‘matilla Yo‘ldoshev, YeI delegatsiyasiga esa Tashqi ishlar bo‘yicha Yevropa xizmatining inson huquqlari va demokratiya bo‘yicha direktori Silvio Gonsata boshchilik qildi.
Muzokarada inson huquqlari bo‘yicha qator masalalar, jumladan hibsdagi shaxslarga munosabat, so‘z erkinligi, ayollar huquqlari va birlashmalar erkinligi haqida fikr almashildi.
YeI O‘zbekiston tomonidan bolalar mehnatidan foydalanishga chek qo‘yish borasida amalga oshirilgan ishlarni e’tirof etdi va mamlakatni majburiy mehnat masalalari bo‘yicha Xalqaro mehnat tashkiloti bilan hamkorlikni davom ettirishga chaqirdi.
Inson huquqlari bo‘yicha “YeI — O‘zbekiston” muzokarasining keyingi davrasi 2015-yilda bo‘lib o‘tadi.
Izoh (0)