Maishiy chiqindilar chiqindi yig‘ish punktlaridan har kuni olib chiqib ketilishi kerak

O‘zbekiston “O‘zkommunxizmat” agentligi bosh direktorining buyrug‘i bilan Maishiy chiqindilarni tashish qoidalari (pdf) tasdiqlandi.

Mazkur Qoidalar Vazirlar Mahkamasining 2014-yil 15-iyuldagi 194-son qarori bilan tasdiqlangan Qattiq va suyuq maishiy chiqindilarni to‘plash va olib chiqib ketish xizmatlarini ko‘rsatish qoidalariga muvofiq, qattiq va suyuq maishiy chiqindilarni to‘plash va olib chiqib ketish xizmatlarini ko‘rsatishda qo‘llaniladi.

Ushbu xizmatlar shaharlarda — ixtisoslashtirilgan sanitariya-tozalash tashkilotlari tomonidan, tuman markazlari, shaharchalar va qishloq aholi punktlarida — tuman obodonlashtirish boshqarmalari yoki ixtisoslashtirilgan sanitariya-tozalash tashkilotlari tomonidan amalga oshiriladi.

Chiqiqndilar aniq va uzluksiz tashib ketilishini tashkil qilish uchun ijrochi tomonidan quyidagi chora-tadbirlar amalga oshiriladi:

• chiqindilarning to‘planish me’yorlarini aniqlash;
• chiqindilarni olib chiqib ketishning davriy muddatlarini belgilash;
• axlat to‘plash shoxobchalarining konteynerlar bilan jihozlanishini ta’minlash;
• iste’molchilar bilan maishiy chiqindilarni olib chiqib ketish xizmatlari ko‘rsatish bo‘yicha shartnomalar tuzish;
• maxsus transport vositalarining yo‘nalish jadvallarini ishlab chiqish.

Hujjatga boshqa qator qoidalar ham kiritilgan.