Peskov Putinning XXR rahbari rafiqasiga ko‘rsatgan “iltifot”ini izohladi

Rossiya prezidenti Vladimir Putinning Xitoy Xalq Respublikasi raisi Si Szinpinning rafiqasi yelkasiga ro‘mol tashlab qo‘yganini izohlar ekan, prezident matbuot kotibi Dmitriy Peskov buning oddiy xatti-harakat ekanligini ta’kidladi. Bu haqda Rbc.ru xabar berdi.

“Urf-odatlar ham, ayol kishilar ham o‘z yo‘liga, biroq hamma ham sovqotishi mumkin. Putinning Xitoy birinchi xonimiga ro‘mol bergani — har kim ham qilishi mumkin bo‘lgan oddiy xatti-harakatdir. Qolgan barchasi — g‘iybatlar va keraksiz muhokamalar g‘irt bema’nilikdir”, — dedi Peskov.

Eslatib o‘tamiz, Pekindagi Osiyo-Tinch okeani iqtisodiy hamkorlik sammiti davomida Xitoy Xalq Respublikasi Markaziy televideniyesi Rossiya prezidenti Vladimir Putinning mamlakat raisi rafiqasiga iltifot ko‘rsatganini kameraga muhrlagani xabar berilgan edi.

Rasmiy suhbat chog‘ida Putin Pen Liyuanning yelkasiga ro‘mol tashlab qo‘ydi. Kadrlarda uning ro‘molni sekingina olib qo‘yib, boshqa narsani kiyib olganini ko‘rish mumkin.

Oradan bir necha soat vaqt o‘tib, videodan ushbu lavha kesib tashlandi. Bundan tashqari, ushbu video avval joylangan barcha Xitoy portallaridan yo‘qola boshladi, Xitoy yangilik saytlari ham o‘z saytlaridan uni olib tashladi, senzorlar esa ijtimoiy tarmoqlarni ushbu videodan tozalay boshladi.