Россия президенти Владимир Путиннинг Хитой Халқ Республикаси раиси Си Цзиньпиннинг рафиқаси елкасига рўмол ташлаб қўйганини изоҳлар экан, президент матбуот котиби Дмитрий Песков бунинг оддий хатти-ҳаракат эканлигини таъкидлади. Бу ҳақда Rbc.ru хабар берди.
«Урф-одатлар ҳам, аёл кишилар ҳам ўз йўлига, бироқ ҳамма ҳам совқотиши мумкин. Путиннинг Хитой биринчи хонимига рўмол бергани — ҳар ким ҳам қилиши мумкин бўлган оддий хатти-ҳаракатдир. Қолган барчаси — ғийбатлар ва кераксиз муҳокамалар ғирт бемаъниликдир», — деди Песков.
Эслатиб ўтамиз, Пекиндаги Осиё-Тинч океани иқтисодий ҳамкорлик саммити давомида Хитой Халқ Республикаси Марказий телевидениеси Россия президенти Владимир Путиннинг мамлакат раиси рафиқасига илтифот кўрсатганини камерага муҳрлагани хабар берилган эди.
Расмий суҳбат чоғида Путин Пэн Лиюаннинг елкасига рўмол ташлаб қўйди. Кадрларда унинг рўмолни секингина олиб қўйиб, бошқа нарсани кийиб олганини кўриш мумкин.
Орадан бир неча соат вақт ўтиб, видеодан ушбу лавҳа кесиб ташланди. Бундан ташқари, ушбу видео аввал жойланган барча Хитой порталларидан йўқола бошлади, Хитой янгилик сайтлари ҳам ўз сайтларидан уни олиб ташлади, цензорлар эса ижтимоий тармоқларни ушбу видеодан тозалай бошлади.
Изоҳ (0)