O‘zbekiston Respublikasi Adliya vazirligida adliya organlari va muassasalari tomonidan joriy yilning 9 oyi davomida amalga oshirilgan ishlar va kelgusidagi vazifalarga bag‘ishlangan kengaytirilgan Hay’at majlisi bo‘lib o‘tdi. Bu haqda vazirlik rasmiy sayti xabar bergan.
Majlisda Adliya vaziri N. Yo‘ldoshev ta’kidlaganidek, hisobot darida faoliyatdan kelib chiqib 72 ta normativ-huquqiy hujjatlar, jumladan 15 ta qonun loyihalari ishlab chiqildi. 225 ta xalqaro shartnoma loyihalari huquqiy ekspertizadan o‘tkazildi. 248 ta idoraviy normativ-huquqiy hujjatlar davlat ro‘yxatiga olindi.
Qo‘llanilgan ta’sir choralari natijasida davlat organlarining 1195 ta noqonuniy qarorlari bekor qilinib, ijrosi to‘xtatildi, 807 nafar shaxs ma’muriy, 20 nafar aybdor mansabdor shaxslar jinoiy javobgarlikka tortildi. Sudlarga 102 milliard so‘mdan ortiq da’vo arizalar kiritilib, faoliyat ko‘rsatmayotgan 1493 ta tadbirkorlik subyektlarining faoliyati tiklandi. Aholining huquqiy ongi va huquqiy madaniyatini oshirish maqsadida 40 mingdan ortiq huquqiy targ‘ibot tadbirlari tashkil etildi.
Qonunchilikni mustahkamlash va ayrim sohalarga oid munosabatlarni tartibga solishga qaratilgan bir qator normativ-huquqiy hujjatlar loyihalarining ishlab chiqilishi ham ta’minlandi. Jumladan, ma’muriy amaliyotni takomillashtirish, davlat organlariga bu borada uslubiy yordam ko‘rsatish maqsadida, ma’muriy huquqbuzarliklar to‘g‘risidagi ishlarni yuritishda zarur bo‘lgan 40 dan ortiq hujjatlar namunalarini o‘z ichiga olgan “Ma’muriy huquqbuzarlik to‘g‘risidagi ishlarni yuritish bo‘yicha hujjatlar namunalari” nomli to‘plam nashr etildi. Yuridik xizmat xodimlariga uslubiy rahbarlikni ta’minlash maqsadida, Yuridik xizmat va shartnomaviy-huquqiy munosabatlarni tartibga solishga oid normativ-huquqiy hujjatlar to‘plami tayyorlandi.
Aholiga notarial harakatlarga oid bepul maslahat berish kunlarini tashkil etish tadbirlari joriy etilib, unga ko‘ra hozirda mahalliy hokimliklar bilan birga joylarda reja asosida “bepul masalahat berish kunlari” o‘tkazilmoqda. Huquqiy yordam ko‘rsatishda qulayliklar yaratish maqsadida, Qoraqalpog‘iston Respublikasi, Andijon, Buxoro va Surxondaryo viloyatlari davlat notarial idoralari uchun qo‘shimcha shtat birliklari joriy etildi.
FHDYo organlari va davlat notarial idoralarining moddiy-texnika bazasini yanada mustahkamlash va ularni zamonaviy bino va jihozlar bilan ta’minlash maqsadida 10 ta yangi bino foydalanishga topshirildi, 8 ta ma’muriy binoda ta’mirlash ishlari nohoyasiga yetkazildi.
Majlisda amalga oshirilgan ishlar bilan birga, ayrim adliya organlari va muassasalari faoliyatida yo‘l qo‘yilgan xato va kamchiliklar keskin tanqid qilindi. Xususan, Qashqadaryo, Xorazm va Navoiy viloyat adliya organlari tomonidan fuqarolarning murojaatlari bilan ishlash, ish rejalarini tuzishdagi kamchiliklar, mahalliy davlat hokimiyati organlarining normativ huquqiy hujjatlarini ekspertizadan o‘tkazishdagi muammolar, huquqiy ta’sir choralarini qo‘llashdagi qonunchilik talablariga qat’iy rioya etish yuzasidan mas’ul rahbarlarning axborotlari tinglandi va kamchiliklarni bartaraf etishga qaratilgan zarur ko‘rsatmalar berildi.
Majlisda shuningdek, ijro intizomini kuchaytirish soha faoliyatini tizimli o‘rganish va nazorat qilish, ish rejalarni sifatli ijrosini ta’minlash, yuridik va jismoniy shaxslarning murojaatlari bilan ishlash mexanizmlarini yanada takomillashtirish, mahalliy davlat hokimiyati organlarining norma ijodkorligi sohasini doimiy tahlil qilish va muvofiqlashtirishda o‘zaro hamkorlikni kengaytirish, tadbirkorlar huquqlarini sud tartibida himoya qilish, “Ishonch telefoni” bilan ishlash samaradorligini oshirishga qaratilgan bir qator masalalar ham muhokama etildi hamda Hay’at majlisining qarori qabul qilindi.
Izoh (0)