O‘zbekistonda yangi tashkil etilgan va o‘z faoliyatini “MTS-O‘zbekiston” (“O‘zdunrobita”)ning sobiq quvvatlari orqali yo‘lga qo‘yayotgan UMS mobil aloqa operatori o‘z abonentlariga 4G-internet taklif qilishi mumkin. Bu haqda o‘z manbalariga asoslangan iLike.uz blogiga tayanib, “Kun” xabar bermoqda.
“Manbalarning tasdiqlashicha, UMS o‘z faoliyatini LTE 2600 (4G) texnologiyasi bilan boshlaydi”, — deb yozadi blog.
Blogning qayd etishicha, bu xizmat barcha abonentlar uchun mo‘ljallangan bo‘ladimi yoki uni alohida tarif sifatida sotishadimi, hozircha bunisi noma’lum.
“Tariflar to‘g‘risidagi ma’lumotlar qat’iy sir saqlanmoqda”, — deb xabar bermoqda iLike.uz.
Qayd etish joiz, avvalroq “MTS”ning O‘zbekistondagi yangi sho‘basi uchun tarif siyosatini tashkil etish bo‘yicha mutaxassislar kerakligi ma’lum bo‘lgandi.
Ma’lumot uchun, Rossiyaning “MTS” kompaniyasi hamda O‘zAATTQning “Radioaloqa, radioeshittirishlar va televideniye markazi” DUK o‘rtasida tashkil etilgan UMS (Universal Mobile Systems) kompaniyasi tijoriy faoliyatini 1-dekabr kuni boshlashi kerak.
Izoh (0)