Ukrainaning Polsha bilan chegaradosh Lvov viloyatida NATOning 15 davlati va Ukraina hamkorligidagi Rapid Trident 2014 (“Uch ayrili tezkor nayza — 2014”) harbiy mashg‘ulotlari boshlandi, deya xabar berdi Euronews.
Manyovrlar butun Shimoliy Atlantika alyansi emas, AQSh boshchiligida o‘tkazilmoqda. Ularda jami 1300 askar, jumladan 200 nafar amerikaliklar ishtirok etadi.
Mashg‘ulotlar chog‘ida bronetexnikadan foydalanish, o‘qotar qurollardan o‘t ochish va vertolyot parvozlarini amalga oshirish ko‘zda tutilgan. Vaziyatli mashqlar davomida harbiy xizmatchilar qo‘lda yasalgan portlovchi qurilmalarni zararsizlantirishi, qo‘riqlov-kuzatish va patrullik ishlarini amalga oshirishi kerak bo‘ladi.
Mashg‘ulotlar dastlab iyul oyiga rejalashtirilgan, biroq mamlakat sharqidagi tanglik tufayli ortga surilgan edi.
AQSh davlat departamenti matbuot kotibi Mari Xarf “Uch ayrili tezkor nayza — 2014”ning Ukrainadagi vaziyatga aloqasini yo‘qligini ta’kidladi. “Bu har yili tashkil qilinadigan tadbir”, — dedi u va buning oldindan rejalashtirilganini qo‘shimcha qildi.
Izoh (0)