Украинанинг Польша билан чегарадош Львов вилоятида НАТОнинг 15 давлати ва Украина ҳамкорлигидаги Rapid Trident 2014 («Уч айрили тезкор найза — 2014») ҳарбий машғулотлари бошланди, дея хабар берди Euronews.
Манёврлар бутун Шимолий Атлантика альянси эмас, АҚШ бошчилигида ўтказилмоқда. Уларда жами 1300 аскар, жумладан 200 нафар америкаликлар иштирок этади.
Машғулотлар чоғида бронетехникадан фойдаланиш, ўқотар қуроллардан ўт очиш ва вертолёт парвозларини амалга ошириш кўзда тутилган. Вазиятли машқлар давомида ҳарбий хизматчилар қўлда ясалган портловчи қурилмаларни зарарсизлантириши, қўриқлов-кузатиш ва патруллик ишларини амалга ошириши керак бўлади.
Машғулотлар дастлаб июль ойига режалаштирилган, бироқ мамлакат шарқидаги танглик туфайли ортга сурилган эди.
АҚШ давлат департаменти матбуот котиби Мари Харф «Уч айрили тезкор найза — 2014»нинг Украинадаги вазиятга алоқаси йўқлигини таъкидлади. «Бу ҳар йили ташкил қилинадиган тадбир», — деди у ва бунинг олдиндан режалаштирилганини қўшимча қилди.
Изоҳ (0)