NATO Rossiya bilan munosabatlarini tuzatishga muvaffaq bo‘la olmadi. Bu haqda 15-sentabr, dushanba kuni Alyans bosh kotibi Anders Fog Rasmussen ma’lum qildi, deb yozadi “Segodnya”.
“Biz uzoq vaqt davomida Rossiya bilan xavfsizlik masalalari, xalqaro huquq va me’yorlarga muvofiq ravishda sheriklik aloqalarini qurishga astoydil harakat qildik”, — dedi u Bryusseldagi nutqida.
“Afsuski, Rossiya barcha urinishlarimizni rad qildi”, — deya qo‘shimcha qildi Rasmussen o‘zining Alyans bosh kotibligi lavozimidagi ishlariga yakun chiqarar ekan.
Shimoliy Atlantika alyansi bosh kotibi fikricha, Rossiya NATOni sherikdan ko‘ra ko‘proq dushman sifatida qabul qilishda davom etmoqda.
Shu bilan birga, Rasmussen Alyansga kirish uchun zarur islohotlarni qabul qilishga tayyor bo‘lgan mamlakatlar uchun NATO eshiklari ochiq qolishi haqida aytib o‘tdi.
Eslatib o‘tamiz, Rasmussenning Alyansga rahbarlik muddati sentabr oxirida tugaydi. 1-oktabrdan NATO bosh kotibi lavozimini Norvegiya sobiq bosh vaziri Yens Stoltenberg egallaydi.
Izoh (0)