AQSh Rossiyaga qarshi sanksiyalarni bekor qilish uchun o‘z shartlarini aytdi

Ukrainada o‘t ochishni to‘xtatish bo‘yicha Minsk bitimiga rioya qilinsa, AQSh Rossiyaga qarshi sanksiyalarning so‘nggi davrasini bekor qilishga tayyor. Bu haqda 15-sentabr, dushanba kuni Davlat departamenti vakili Mari Xarf jurnalistlarga ma’lum qildi, deb yozadi “RIA Novosti”.

“Agar Rossiya 5-sentabrdagi Minsk bitimini to‘liq amalga oshirsa, sanksiyalarning so‘nggi davrasini qaytarib olish uchun yo‘l ochiladi. Biz Minsk bitimi va unda o‘t ochishni to‘xtatish bo‘yicha keltirilgan 12 ta qadam bajarilishini ko‘rishimiz kerak, — dedi Xarf. — Agar Ukrainadagi vaziyatni keskinlashtirish uchun qo‘shimcha xatti-harakatlar amalga oshirilsa, qo‘shimcha sanksiyalar ham kiritiladi”.

Uning so‘zlariga ko‘ra, so‘nggi kunlarda o‘t ochishni to‘xtatish rejimi xavf ostida qoldi. Bunga Yevropada xavfsizlik va hamkorlik tashkiloti kuzatuvchilarining o‘qqa tutilgani va Donetsk aeroportida jang bo‘lib o‘tgani sabab bo‘ldi. AQSh bunda ayirmachilarni ayblamoqda.

“Biz shartnomaning ayirmachilar tomonidan bir necha marta buzilishiga guvoh bo‘ldik. Ushbu vaziyat o‘zgarishini xohlardik, — dedi Xarf. — Buning uchun barcha tomonlar jar yoqasidan chetlashib, boshqa yo‘ldan ketishi lozim”.