Merkel Putinni Ukrainadan qo‘shinlarini chiqarib ketishga chaqirdi

Germaniya kansleri Angela Merkel Rossiya prezidenti Vladimir Putinni Ukrainadan o‘z qo‘shinlarini to‘liq olib chiqib ketishga da’vat etdi. Ikki davlat yetakchilari telefon suhbatida bu haqda gap bordi, deya xabar berdi Wall Street Journal kansler vakiliga tayanib.

Merkelning fikricha, qo‘shinlarning olib chiqib ketilishi va chegaraning samarali himoya qilinishi nizoga chek qo‘yishning asosiy unsurlaridan biridir.

Kansler matbuot kotibi Shtefan Zaybert so‘zlariga ko‘ra, Merkel shuningdek tabiiy gazni yetkazib berish masalasi bo‘yicha cho‘zilib ketgan munozaralarni hal qilish uchun Rossiya, Ukraina va Yevropa ittifoqi o‘rtasidagi uch tomonlama muzokaralarni davom ettitrishga chaqirdi.

Ayni paytda Rossiya prezidentining matbuot xizmati esa o‘z xabarida Merkelning qo‘shinlarni chiqarib ketish zaruriyati haqidagi gapini keltirmagan.

Unda “yetakchilar Yevropa ittifoqi va Ukraina o‘rtasida hamkorlik to‘g‘risidagi bitim ijrosining keyinga qoldirilishi bo‘yicha erishilgan kelishuvlarga ijobiy baho bergani” aytiladi.