Германия канцлери Ангела Меркель Россия президенти Владимир Путинни Украинадан ўз қўшинларини тўлиқ олиб чиқиб кетишга даъват этди. Икки давлат етакчилари телефон суҳбатида бу ҳақда гап борди, дея хабар берди Wall Street Journal канцлер вакилига таяниб.
Меркелнинг фикрича, қўшинларнинг олиб чиқиб кетилиши ва чегаранинг самарали ҳимоя қилиниши низога чек қўйишнинг асосий унсурларидан биридир.
Канцлер матбуот котиби Штефан Зайберт сўзларига кўра, Меркель шунингдек табиий газни етказиб бериш масаласи бўйича чўзилиб кетган мунозараларни ҳал қилиш учун Россия, Украина ва Европа иттифоқи ўртасидаги уч томонлама музокараларни давом эттитришга чақирди.
Айни пайтда Россия президентининг матбуот хизмати эса ўз хабарида Меркелнинг қўшинларни чиқариб кетиш зарурияти ҳақидаги гапини келтирмаган.
Унда «етакчилар Европа иттифоқи ва Украина ўртасида ҳамкорлик тўғрисидаги битим ижросининг кейинга қолдирилиши бўйича эришилган келишувларга ижобий баҳо бергани» айтилади.
Изоҳ (0)