Украинада ўт очишни тўхтатиш бўйича Минск битимига риоя қилинса, АҚШ Россияга қарши санкцияларнинг сўнгги даврасини бекор қилишга тайёр. Бу ҳақда 15 сентябрь, душанба куни Давлат департаменти вакили Мари Харф журналистларга маълум қилди, деб ёзади «РИА Новости».
«Агар Россия 5 сентябрдаги Минск битимини тўлиқ амалга оширса, санкцияларнинг сўнгги даврасини қайтариб олиш учун йўл очилади. Биз Минск битими ва унда ўт очишни тўхтатиш бўйича келтирилган 12 та қадам бажарилишини кўришимиз керак, — деди Харф. — Агар Украинадаги вазиятни кескинлаштириш учун қўшимча хатти-ҳаракатлар амалга оширилса, қўшимча санкциялар ҳам киритилади».
Унинг сўзларига кўра, сўнгги кунларда ўт очишни тўхтатиш режими хавф остида қолди. Бунга Европада хавфсизлик ва ҳамкорлик ташкилоти кузатувчиларининг ўққа тутилгани ва Донецк аэропортида жанг бўлиб ўтгани сабаб бўлди. АҚШ бунда айирмачиларни айбламоқда.
«Биз шартноманинг айирмачилар томонидан бир неча марта бузилишига гувоҳ бўлдик. Ушбу вазият ўзгаришини хоҳлардик, — деди Харф. — Бунинг учун барча томонлар жар ёқасидан четлашиб, бошқа йўлдан кетиши лозим».
Изоҳ (0)