Тошкентда Сеул боғининг очилиш маросими бўлиб ўтди (фото)

Тошкентда Бобур боғи ҳудудида қурилган Сеул боғининг очилиш маросими бўлиб ўтди, дея хабар бермоқда UzDaily.

Тадбирда Сеул мэрияси делегацияси ва Тошкент ҳокимияти вакиллари, шунингдек маданий марказлар вакиллари иштирок этди.

Нашрнинг таърифлашича, боғда бир хил услубдаги бироқ турлича вазифага эга иншоотлар мавжуд.

Бу ерда қўнғироқли павильон ҳам бўлиб, унга биринчи зарбани ҳоким Раҳмонбек Усмонов ва Корея Республикасининг Ўзбекистондаги элчиси Ли Ук Хён берди.

Сеул боғи пойтахтдаги Бобур истироҳат боғи ҳудудида жойлашган бўлиб, унинг умумий майдони 17,5 гектарни, кўкаламзорлаштирилган ҳудуд 7 гектарни ташкил этади.

Корея томонидан молиялаштирилган Тошкентдаги «Сеул боғи»ни қуришдан асосий мақсад Жанубий Корея маданияти, анъаналари, миллий хусусиятларини тарғиб этишга, шунингдек, мамлакатлар ўртасида икки томонлама ҳамкорликни ривожлантиришга кўмаклашишдан иборат бўлди.

Таъкидлаш жоиз, Ислом Каримовнинг 2010 йил февраль ойида Жанубий Кореяга қилган ташрифи чоғида Тошкент ва Сеул шаҳарлари маъмуриятлари вакиллари ўртасида Тошкентдаги «Сеул боғи»ни қуриш бўйича келишув имзоланган эди.