O‘zbekiston saytlari test natijalari niqobi ostida virus tarqatmoqda (qo‘shimcha)

Qarshi shahrida joylashgan Open Web MChJ rahbari Ruslan Rustamov daxshat.uz va payclick.uz saytlari orqali Davlat test markazi test natijalarini e’lon qilgani haqida yolg‘on ma’lumot beruvchi virus tarqalayotgani haqida xabar berdi.

daxshat.uz va payclick.uz saytlariga “DTM 2014-o‘quv yili uchun o‘tish ballarini e’lon qildi” deb yozilgan reklama bannerlari joylashtirildi. Ushbu bannerni bosishdan so‘ng foydalanuvchi kompyuteriga arxivlangan fayl ko‘chirib olinadi. U fayl esa, o‘z navbatida, kompyuter brauzerida mavjud bo‘lmagan http://payclick.uz/downloads/DTM-2014.r sahifasini ochishga harakat qiladi.

E’tiborli tomoni, reklama bannerlarida imlo xatolariga yo‘l qo‘yilmagan.

“Daryo” mutaxassislari xato kiritilgan URLni davom ettirib, faylni yuklab olishga muvaffaq bo‘lishdi. Fayl ichida DTM.uz saytida joylangan 2013-yil natijalari skrinshotlari, 2013-yil kontrakt narxlari — jami to‘rtta fayl borligi aniqlandi.

Bundan tashqari, yuklab olingan fayl mail.ru serverlariga murojaat qiladi. Virusni yuklab olgan Facebook foydalanuvchisi so‘zlariga ko‘ra, mail.ru serverlari orqali “Amigo” brauzeri foydalanuvchi bilmagan holda avtomatik tarzda yuklab olinadi.

Joylashtirilgan reklama banneri va test natijalari e’lon qilingani haqida DTM rasmiy ma’lumot bermagan.

“Daryo” xodimlari ogohlantiradi: test natijalari faqat va faqat DTM rasmiy sayti — dtm.uz'da e’lon qilinadi. Boshqa saytlarda test natijalari e’lon qilinmaydi.

Test natijalari e’lon qilinish sanasi haqida ommaviy axborot vositalari, jumladan, “Daryo” sahifalarida xabar beriladi.

Qo‘shimcha (17:24). Xabar joylanganidan so‘ng “Daryo” tahririyatiga payclick.uz sayti administratori Aleksandr (familiyasini aytishdan bosh tortdi) qo‘ng‘iroq qildi. Uning ta’kidlashicha, sayt virus va yolg‘on xabar tarqatmayapti. Biz Aleksandrga bu borada yozma raddiya berishni taklif qildik, ammo hozirgacha undan hech qanday xabar olmadik.

Aleksandrdan qo‘shimcha ma’lumot, tushuntirish yoki raddiya olishimiz bilan uni “Daryo” sahifalariga joylaymiz.

Ushbu xabardan so‘ng daxshat.uz va payclick.uz saytlaridan noxolis axborot tarqatayotgan banner olib tashlandi.