Android платформасида ишлаб чиқилган замонавий ахборот-коммуникация технологиялари (АКТ) атамаларининг янги ўзбекча-русча-инглизча луғати мобил телефонлар ва қурилмаларда кенг фойдаланиш учун Google Play (Android смартфонлар ва планшетлар учун дастурларнинг расмий онлайн бозори)га жойланди. Бу ҳақда Infocom.uz хабар берди.
Ушбу АКТ луғатида ахборот коммуникасия технологияларининг турли йўналишлари, жумладан, компьютерлаштириш ва ахборотлаштириш, телекоммуникация ва тармоқ технологиялари, дастурий ва ускунавий таъминот, электрон ҳукумат, ахборот хавфсизлиги, телекоммуникация тизимлари, маълумотларни қайта ишлаш, масофавий таълим, давлат бошқарувида АКТдан фойдаланиш соҳалари бўйича 5000 га яқин атама ва тушунчалар мавжуд.
Луғатнинг қулай афзалликлари сифатида, бу ресурс ҳажмининг чегараланмаганлиги, фойдаланувчининг ресурсдан масофадан туриб ва мунтазам фойдаланиш имконияти, керакли атаманинг ўзбек, рус ва инглиз тилларида ҳам алифбо тарзда, ҳам алоҳида сўз сифатида тез қидириш имконияти, тушунча ва атамаларнинг ўзбек тилидаги (кирилл ва лотин алифбосида) аниқ изоҳлари берилиши ва унинг рус ва инглиз тилидаги муқобиллари келтирилишини кўрсатиб ўтиш мумкин.
АКТ луғатининг мобил иловаси турли касб эгалари бўлган фойдаланувчилар, жумладан АКТ соҳа мутахассислари, тадқиқот институтлари илмий ходимлари, ҳокимликларнинг ахборот хизматлари, таржимонлар, филологлар, тегишли ўқув юртларнинг ўқитувчи ва талабалари, бошловчи ва тажрибали АТ фойдаланувчилар ва бошқалар учун мўлжалланган.
Шунингдек, бу луғат ZiyoNET таълим порталига кенг фойдаланиш учун жойлаштирилган бўлиб, уни АКТ соҳасидаги янги сўз ва атамалар билан тўлдириб бориш имкони мавжуд.
АКТ луғатининг электрон ва мобил версияларини яратиш ташаббуси БМТТДнинг «Маҳаллий бошқарув тизимини қўллаб-қувватлаш» лойиҳаси (БМТТД лойиҳаси) томонидан ва «Узинфоком» ДУК кўмаги остида амалга оширилган бўлиб, униг мақсади БМТТДнинг «Мамлакатни ривожлантириш учун АКТ сиёсатини шакллантириш ва татбиқ этишда Ўзбекистон Республикаси Ҳукуматига кўмаклашиш» лойиҳаси томонидан нашр қилинган «АКТ бўйича атамалар глоссарийси»дан (биринчи нашр 2005 йилда ва иккинчи нашр 2010 йилда чиққан) фойдаланувчиларнинг сонини кўпайтиришдан иборатдир.
БМТТД лойиҳаси Ўзбекистон Республикаси Вазирлар Маҳкамаси билан ҳамкорликда Жиззах, Наманган ва Тошкент вилоятларида, маҳаллий ҳукумат ва бошқарув органларининг ҳуқуқий, техникавий ва кадрлар салоҳиятини мустаҳкамлаш, уларнинг ҳисобдорлиги ва очиқ-ойдинлигини ошириш ҳамда фуқароларнинг маҳаллий бошқарувда иштирок этишига кўмаклашиш йўли билан Ўзбекистонда маҳаллий бошқарувнинг янада самарали, ҳисобдор ва инклюзив тизимини ривожлантириш мақсадларида амалга оширилмоқда.
Изоҳ (0)