Ukraina prezidenti Pyotr Poroshenkoning Bojxona Ittifoqi davlatlari yetakchilari bilan qachon uchrashishi hozircha noma’lum, deya xabar berdi “Segodnya” nashri Belorussiyaning Ukrainadagi elchisi Valentin Velichko bayonotiga tayanib.
“Putin, Nazarboyev, Lukashenko uchrashuvda qatnashishga tayyorligini tasdiqladi. Va bu bizning prezidentimiz (Lukashenko) tomonidan Ukraina prezidenti Pyotr Poroshenkoga yetkazildi”, — dedi elchi 18-avgust, dushanba kuni Kiyevda bo‘lib o‘tgan matbuot anjumanida.
Shu bilan birga, u Bojxona Ittifoqi davlatlari yetakchilari uchrashuvda AQSh yoki YeI vakillari qatnashishini yoqlab chiqqanligini aytdi.
“Ushbu uchrashuv shakli bo‘yicha kelishuvga erishilganidan keyin sanani e’lon qilishadi”, — deya qo‘shimcha qildi Velichko.
Nashrning eslatishicha, avvalroq Yevrokomissiya Ukraina-YeI-Rossiya formatida uch tomonlama uchrashuv o‘tkazish haqida e’lon qilgan edi. Pyotr Poroshenko, Joze Manuel Barrozu va Vladimir Putin ishtirokida o‘tadigan muzokaralarda Ukraina sharqidagi vaziyatni barqarorlashtirish, YeI bilan assotsiatsiyaning amalga joriy qilinishi va gaz yetkazib berish masalalari muhokama qilinadi.
Izoh (0)