БМТ Бош котиби Пан Ги Мун АҚШ ҳукуматини Миссури штати Фергюсон шаҳрида 18 ёшли Майкл Браун ўлими муносабати билан ўтказилаётган тинч намойишларда фуқаролар ҳуқуқлари ва сўз эркинлигини ҳимоя қилишга чақирди. Бу ҳақда БМТ расмий вакили Стефан Дужаррик баёнотига таяниб, «РИА Новости» хабар берди.
«Бош котиб ҳукуматни тинч намойишлар ўтказиш ва фикрни эркин ифода этиш ҳуқуқлари ҳимоя қилинишини таъминлашга даъват этади», — деди Дужаррик. Унинг сўзларига кўра, Пан Ги Мун шунингдек «барчани босиқликка чақирмоқда, тартиб соқчиларидан эса намойишчилар билан муомала қилишнинг америкача ва халқаро меъёрларига риоя этишни сўрамоқда».
Дужаррик айтишича, Пан Ги Мун «маҳаллий ва федерал терговчилар ушбу қотилликни аниқлаштириши ва натижада адолат қарор топишига умид қилиб қолади».
Эслатиб ўтамиз, 9 август куни Фергюсон шаҳрида 18-ёшли Майкл Браун исмли қора танли йигит полициячилар томонидан отиб ўлдирилди. Шундан сўнг шаҳарда оммавий намойишлар ва тартибсизликлар бошланиб кетган. Полиция уларга қарши резина ўқ ва кўзни ёшлантирувчи газ қўлламоқда.
Изоҳ (0)