Бирлашган Араб Амирликларининг Ўзбекистондаги BM Store савдо белгиси остида фаолият юритувчи компанияси пойтахтда илк марта матбуот анжумани ўтказди. У асосан Facebook ижтимоий тармоғида нотўғри ўтказилган онлайн-танлов бўйича келиб чиққан низоларга бағишланди, деб ёзади Podrobno.uz.
Танлов шартларига кўра, фойдаланувчилар ёзни қандай ўтказиши ҳақида ролик суратга олиб, уни BM Store саҳифасига жойлаши керак бўлган. Энг кўп «лайк» йиққан иштирокчини ғолиблик ва Samsung Galaxy K zoom смартфони кутган.
Аввалига 6—30 июнь кунларига белгиланган муҳлат, танлов сўнгги кунига келиб, 1 июлгача чўзилган. Натижада, 30 июнь куни энг кўп «лайк» йиғиб турган фойдаланувчи Антон Кимдан эртаси куни бошқа фойдаланувчи Максим Гажиев «лайк»лар сони бўйича ўзиб кетган.
Интернетда авж олган шов-шувдан хабар топгач, компаниянинг Дубайдаги бош офиси танлов натижаларини тан олмаган ва уни қайтадан ўтказишни буюрган. Бироқ Гажиевдан бош соврин олиб қўйилмади, натижадан норози бўлган қолган икки иштирокчига фаоллик учун Samsung Galaxy S4 мини смартфонлари тақдим этилди.
BM Store вакиллари матбуот анжуманида танлов ўтказишда омилкор бўла олмаганларини тан олди ва энди овозларни ҳисоблашда диққатли бўлишга ваъда берди. Компания навбатдаги танловни яқин орада ўтказади, бироқ унинг шартлари ҳозирча номаълум.
Изоҳ (0)