2014-yil 26-iyun kuni O‘zbekiston Respublikasi Prezidenti “2014/2015-o‘quv yilida O‘zbekiston Respublikasining oliy ta’lim muassasalariga qabul to‘g‘risida”gi qarorga imzo chekdi. Bu haqda Xushnudbek Xudayberdiyev o‘z blogida xabar berdi.
Ushbu qarorda oliy ta’lim muassasalariga talabalarni qabul qilish kvotasi belgilab berilgan bo‘lib, unga ko‘ra 2014/2015-o‘quv yilida bakalavr ta’lim yo‘nalishiga 57 907 nafar talaba qabul qilinadi. Shularning 19 120 nafari davlat grantida va 38 787 nafari to‘lov-kontrakt bo‘yicha tahsil oladi.
Agar taqqoslasak, bu yilgi kvota o‘tgan yilgiga qaraganda 1300 nafarga (hammasi kontrakt) ko‘pdir.
Joriy yilda oliy ta’lim muassasalariga 5 000 nafar magistr, shundan 1548 nafari davlat granti, 3452 nafari esa to‘lov-kontrakt asosida o‘qishga qabul qilinishi belgilangan.
Ushbu yilda magistratura kvotasi o‘tgan yilgidan 1300 nafarga (hammasi kontrakt) kamaytirilgan.Toshkent kimyo-texnologiya instituti (Qo‘ng‘irot bo‘limi)ning maxsus sirtqi bo‘limiga davlat granti bo‘yicha 65 nafar va Toshkent axborot texnologiyalari universitetining maxsus sirtqi bo‘limiga 50 nafar talaba qabul qilinadi (15ta davlat granti, 35ta shartnoma asosida). Mazkur qabul kvota ko‘rsatkichi o‘tgan yilgi kabi qoldirilgan, hech qanday o‘zgarishlar yo‘q.
O‘tgan yili hujjat topshirgan abituriyentlar soni bo‘yicha rekord natija qayd etilgan edi. Ya’ni 480 ming nafardan ko‘proq abituriyent talabalik baxtiga musharraf bo‘lish uchun o‘z omadini sinab ko‘rishga ahd qilgan edi. Bu bir o‘rin uchun o‘rtacha 8,5 kishi da’vogarlik qilgan deganidir, deya ta’kidladi huquqshunos.
Izoh (0)