O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Buxoro viloyati Qiziltepa tuman bo‘limiga kelib tushgan ma’lumotga asosan o‘tkazilgan tezkor tadbirda Buxoro viloyati G‘ijduvon tumanida yashovchi fuqaro Jonibek Fayzulloyev Farg‘ona viloyatining Qo‘qon shahriga Qiziltepa tumani orqali 25 miliion so‘mlik 10360 kilogramm paxta tolasini qonunga xilof ravishda o‘tkazmoqchi bo‘lganda ushlangan. Bu haqda “Huquq” gazetasi xabar berdi.
Ushbu holat yuzasidan yuk avtomashinasi haydovchisi X.Gadoyevning arizasiga asosan, fuqaro J.Fayzulloyevning yashash xonadoni ko‘zdan kechirilganda, u o‘zining G‘ijduvon tumani “Vazirshoh” mahallasidagi xonadonida elektr tarmoqlari korxonasiga 19 million 627 ming so‘mlik zarar yetkazib, yashirin sex tashkil qilgani, paxta xomashyosini qayta ishlash uskunasi o‘rnatganligi, noqonuniy ravishda tola ishlab chiqarish faoliyati bilan shug‘ullanib kelganligi ma’lum bo‘ldi va undan 9 turdagi jami 9 million 126 ming so‘mlik tovar-moddiy boyliklar ashyoviy dalil sifatida olib qo‘yildi.
Bundan tashqari, J.Fayzulloyev qayta ishlangan paxta tolasini o‘tkazish maqsadida rasmiy hujjatlarni qalbakilashtirib, o‘zining jinoiy sheriklariga taqdim qilib, paxta tolasini takroran o‘tkazib kelganligi ham aniqlandi. Mazkur holat uchun bo‘lim tomonidan J.Fayzulloyevga nisbatan O‘zbekiston Respublikasi JKning tegishli moddalari bilan jinoyat ishi qo‘zg‘atildi. Jinoyat ishlari bo‘yicha Navoiy viloyat sudi tomonidan sudlanuvchi J.Fayzulloyevga nisbatan tegishli jazo choralari qo‘llanildi.
Izoh (0)