Ijtimoiy tarmoqlarda Chinoz tumani hokimi noqonuniy talablarni bajarmagan tadbirkorlarga tegishli korxonalarni elektr tokidan uzib qo‘yayotgani to‘g‘risida xabar tarqaldi. Viloyat hokimligi holatga izoh berdi.
Unga ko‘ra, murojaatda keltirilgan Chinoz tumanidagi Biryuza group MCHJ va “Xalq banki” filiali atrofidagi vaziyat tegishli mutasaddilar ishtirokida o‘rganildi. Tuman hokimligi tomonidan joriy yil 10-fevralda “Chinoz shaharchasini obodonlashtirish, yo‘l yoqasidagi obyektlarni tartibga keltirish hamda noqonuniy qurilmalarni bartaraf etish bo‘yicha nazorat reja”si tasdiqlangan.
Ushbu reja asosida yo‘llarni kengaytirish, piyodalar yo‘laklarini qurish, yashil hududlarni yaratish, yuqori kuchlanishli tarmoqlarni modernizatsiya qilish, yoritish tizimlarini yangilash kabi muhim obodonlashtirish tadbirlari amalga oshirilmoqda. Mazkur doiradagi tadbirlar Osiyo taraqqiyot banki mablag‘lari hisobidan moliyalashtirilayotgan oqova suv tizimini qurish va rekonstruksiya qilish bilan birgalikda olib borilmoqda.
Qayd etilishicha, qurilish va rekonstruksiya jarayonida xavfsizlikni ta’minlash maqsadida elektr ta’minoti vaqti-vaqti bilan o‘chirilishi ko‘zda tutilgan.
Shuningdek, Biryuza group MCHJ Namangan viloyati To‘raqo‘rg‘on tumanida ro‘yxatdan o‘tgan bo‘lib, soliqlarni ham ushbu hududda to‘laydi. Chinoz tumanida ushbu korxona og‘zaki kelishuv asosida ijaraga olingan, talab darajasida bo‘lmagan binoda faoliyat yuritgan.
Korxonaning elektr ta’minoti obodonlashtirish ishlari doirasida rejalashtirilgan ta’mirlash sababli vaqtincha to‘xtatilgan. Bu boshqa tadbirkorlik subyektlariga ham ta’sir qilgan.
Murojaatdagi “Xalq banki” filialining elektr ta’minoti ham ta’mirlash ishlari sababli vaqtincha to‘xtatilgan. O‘rganishlar davomida filial tomonidan Paynet shoxobchasiga elektr ta’minoti noqonuniy ravishda ulangani aniqlandi. Elektr ta’minoti 8-may kuni soat 09:00 da qayta tiklangan.
Bundan avval O‘zbekistonda maʼmuriy sudlar tomonidan 2025-yilning I choragida maʼmuriy va fuqarolar o‘zini o‘zi boshqarish organlarining mansabdor shaxslarining qarorlari ustidan shikoyat qilish to‘g‘risidagi 1 877 ta ish ko‘rib chiqildi. Xususan, hokim qarorini haqiqiy emas deb topish bilan bog‘liq ko‘rib tamomlangan ishlar soni 515 tani tashkil qilib, shundan jismoniy va yuridik shaxslarning 178 ta arizasi qanoatlantirilgan.
Izoh (0)