Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни лэгаллаштиришга қарши курашиш (СВОЖЖДЛҚК) департаментининг Бухоро вилояти Қизилтепа туман бўлимига келиб тушган маълумотга асосан ўтказилган тезкор тадбирда Бухоро вилояти Ғиждувон туманида яшовчи фуқаро Жонибек Файзуллоев Фарғона вилоятининг Қўқон шаҳрига Қизилтепа тумани орқали 25 милиион сўмлик 10360 килограмм пахта толасини қонунга хилоф равишда ўтказмоқчи бўлганда ушланган. Бу ҳақда «Ҳуқуқ» газетаси хабар берди.
Ушбу ҳолат юзасидан юк автомашинаси ҳайдовчиси Х.Гадоевнинг аризасига асосан, фуқаро Ж.Файзуллоевнинг яшаш хонадони кўздан кечирилганда, у ўзининг Ғиждувон тумани «Вазиршоҳ» маҳалласидаги хонадонида электр тармоқлари корхонасига 19 миллион 627 минг сўмлик зарар етказиб, яширин цех ташкил қилгани, пахта хомашёсини қайта ишлаш ускунаси ўрнатганлиги, ноқонуний равишда тола ишлаб чиқариш фаолияти билан шуғулланиб келганлиги маълум бўлди ва ундан 9 турдаги жами 9 миллион 126 минг сўмлик товар-моддий бойликлар ашёвий далил сифатида олиб қўйилди.
Бундан ташқари, Ж.Файзуллоев қайта ишланган пахта толасини ўтказиш мақсадида расмий ҳужжатларни қалбакилаштириб, ўзининг жиноий шерикларига тақдим қилиб, пахта толасини такроран ўтказиб келганлиги ҳам аниқланди. Мазкур ҳолат учун бўлим томонидан Ж.Файзуллоевга нисбатан Ўзбекистон Республикаси ЖКнинг тегишли моддалари билан жиноят иши қўзғатилди. Жиноят ишлари бўйича Навоий вилоят суди томонидан судланувчи Ж.Файзуллоевга нисбатан тегишли жазо чоралари қўлланилди.
Изоҳ (0)