YuNESKO bosh direktori o‘rinbosari Samarqanddagi xalqaro konferensiyadan mamnun bo‘lib, Islom Karimovga xat yozdi

YuNESKO Bosh direktorining o‘rinbosari, Osiyo va Tinch okeani mamlakatlaridagi ilm-fan bo‘yicha mintaqaviy vakolatxonasi direktori Xubert Gizen O‘zbekiston Respublikasi Prezidenti Islom Karimovga maktub yozib, “O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati” mavzusidagi xalqaro ilmiy konferensiya munosabati bilan O‘zbekistonga tashrifi davomida uga ko‘rsatilgan hurmat-ehtirom va mehmondo‘stlik uchun minnatdorlik izhor etdi. Maktub matni O‘zAda e’lon qilindi.

“Siz bilan birga ushbu g‘oyat muhim konferensiyaning ochilish marosimida ishtirok etish men uchun ulkan sharaf bo‘ldi, — deyiladi maktubda. — Anjuman yuksak saviyada tashkil etilgani va teran mazmunli ma’ruzalar bilan meni hayratga soldi. Ayniqsa, Sizning nutqingiz menda katta taassurot qoldirdi. O‘rta asrlarda Sharqning buyuk allomalari va mutafakkirlari qilgan kashfiyotlar, bugungi kunda Sizning rahnamoligingizda ilm-fan va ta’lim sohasida erishilayotgan ulkan yutuq va marralar haqida juda ko‘p foydali ma’lumotga ega bo‘ldim.

O‘zbekistonga qisqa tashrifim davomida Xalqaro quyosh energiyasi instituti, Botanika bog‘i, Toshkent irrigatsiya va melioratsiya instituti, Alisher Navoiy nomidagi Milliy kutubxonada bu yutuqlarning ayrimlari bilan bevosita tanishdim. Olimlar va ilm-fan arboblari bilan fikr almashish, muloqotlar asnosida O‘zbekistonda ilm-fan va ta’limni rivojlantirishga katta e’tibor qaratilayotganiga, o‘rta asrlar Sharq olimlarining ilmiy an’analarini davom ettirgan holda, chuqur bilim va tafakkur mamlakatingiz kelajagini ta’minlashga yo‘naltirilayotganiga amin bo‘ldim. Fursatdan foydalanib, Siz, Janobi Oliylariga, ushbu ezgu ishlarga rahbarlik qilayotganingiz va bu boradagi sa’y-harakatlaringizdan hayratga tushganimni yana bir bor izhor etmoqchiman. 

YuNESKO O‘zbekiston bilan doimo har tomonlama yaqin hamkorlik qilib kelgan. Mamlakatingizda o‘tkazilgan samarali muloqotlardan so‘ng O‘zbekiston va YuNESKO o‘rtasida barcha sohalarda o‘zaro manfaatli hamkorlikni bundan-da mustahkamlash uchun ulkan imkoniyatlar mavjudligiga ishonchim yanada oshdi.”